جدہ(مانیٹرنگ ڈیسک) مسافر بردار طیارے میں سعودی شہزادوں کے ہمراہ 80 عقابوں کی ایک تصویر سوشل میڈیا پر تیزی سے وائرل ہو رہی ہے۔ مذکورہ تصویر میں بزنس کلاس کی آرام دہ کرسیوں پر بیٹھے ہوئے عقاب سعودی شہزادوں کے ہمراہ مفت سفر نہیں کر رہے بلکہ ان کیلئے جہاز کے باقاعدہ ٹکٹ خریدے گئے تھے۔ مذکورہ تصویر میں 80عقاب اپنے مالکان کے ساتھ خصوصی طیارے میں سفر

کر رہے ہیں، عقابوں کے جہاز میں سفر کیلئے کروڑوں روپے کے اخراجات کئے جاتے ہیں اور ان کیلئے پورا جہاز بک کروایا جاتا ہے۔ سعودی شہزادوں کا عقابوں کے ہمراہ سفر کوئی پہلا واقعہ نہیں بلکہ یہ سال میں دو بار خصوصاََ شکار کے دنوں میں اپنے عقابوں کے ساتھ سفر کرتے دکھائی دیتے ہیں۔ اس سے قبل چار سال پہلے بھی ایسی ہی ایک تصویر سوشل میڈیا پر مقبول ہوئی تھی جس میں عرب شہزادے اپنے عقابوں کے ہمراہ مسافر بردار طیارے میں سفر کرتے دکھائی دے رہے تھے۔ سب سے زیادہ دلچسپی کی بات یہ ہے کہ متحدہ عرب امارات میں عقابوں کے لیے پاسپورٹ تک بنوائے جاتے ہیں تاکہ وہ اپنے مالک کے ساتھ بین الاقوامی سفر بھی کرسکیں۔

موضوعات:سعودی شہزادے شکار عقاب