نئی دہلی (مانیٹرنگ ڈیسک) سرجیکل سٹرائیک کے بلند بانگ دعوے کرنے والی بھارتی فوج کا مورال سوشل میڈیا پر جاری کردہ چند ویڈیوز سے ہی ڈاؤن ہو گیا۔ جنرل بپن راوت کہتے ہیں کہ اہلکاروں کے اس اقدام سے سرحد پر موجود فوجیوں کا مورال ڈاؤن ہوا ہے۔
بھارتی آرمی چیف نے ویڈیو اپ لوڈ کرنے والے اہلکاروں کو کڑی سزائیں دینے کا اعلان کرتے ہوئے کہا کہ فوج کے اندر شکایات کے ازالے کا نظام موجود ہے، اہلکاروں کو میڈیا تک نہیں جانا چاہئے تھا۔ بھارتی آرمی چیف نے بھوکے فوجیوں کے کھانے کا بند و بست کرنے کی بجائے سرحد پر منہ توڑ جواب دینے کی بھڑک بھی ماری۔
واضح رہے کہ بی ایس ایف نےبھی اپنے سپاہی کو عادی مجرم قرار دیا تھا۔ تیج بہادر سنگھ یادو کی جانب سے ایک ویڈیو بیان جاری کیا تھا جس میں اس کا کہنا تھا کہ فوجی افسران سب کچھ بیچ باچ کرکھاجاتےہیں، یہاں تک کہ کھانے پینے کاسامان بھی، جبکہ کھانے پینے کو کچھ نہیں دیا جاتا، بارڈر پر کھانے کے لالے پڑگئے ہیں، بھوکے پیٹ کیا خاک جنگ لڑیں گے۔
بھارتی فوجی کا کہنا تھا کہ دوپہر کے کھانے میں دال روٹی ملتی ہے جو کھانے کے لائق نہیں ہوتی ،سرکار کھانے کی رقم دیتی ہےلیکن کھانے میں صرف دال اور ہلدی کاپانی ہے۔

موضوعات:بھارتی آرمی چیف جنرل بپن راوتر