واشنگٹن(این این آئی)امریکی حکومت نے سوڈان پر بیس سالوں کے دوران عائد پابندیوں کو جزوی طور پر ختم کردیا ہے۔عرب ٹی وی کے مطابق امریکی حکومت نے یہ اقدام سوڈانی حکومت کا دہشت گردی کے خلاف مثبت اقدامات کے اعتراف میں کیا ہے، تاہم ابھی تک اس کی وضاحت نہیں کی گئی کہ امریکا نے کون سی پابندیاں ختم کی ہیں۔سوڈان کے خلاف امریکا نے پہلی مرتبہ پابندیاں 1997 میں اور دوسری مرتبہ 2006 میں عائد کی گئی تھیں۔ گزشتہ سال ستمبر میں امریکی وزارت خارجہ نے انسداد دہشت گردی پر تعاون کرنے پر سوڈان کا خیر مقدم کیا تھا۔
بتایا جاتا ہے کہ سوڈان اپنی سرزمیں پر داعش اور دیگر انتہاپسند گروپوں کو کنٹرول کرنے میں کامیاب رہا ہے،ادھرخادم الحرمین الشریفین شاہ سلمان بن عبدالعزیز آل سعود نے سوڈان کے صدر محمد عمر البشیر کو ٹیلیفون پر امریکا کی جانب سے سوڈان پرعاید بعض پابندیاں اٹھائے جانے پرمبارک باد پیش کی ۔دوسری جانب سوڈانی صدر نے خادم الحرمین الشریفین اور سعودی حکومت کی طرف سے خرطوم پر عاید امریکی پابندیوں میں کمی کے لیے کی جانے والی مساعی کا خصوصی شکریہ ادا کیا۔
سوڈانی صدر کا کہنا تھا کہ ان کے ملک پر عاید امریکی پابندیوں میں نرمی میں سعودی عرب کی مساعی کو ہمیشہ یاد رکھا جائے گا۔اوباما انتظامیہ کا کہنا تھا کہ حالیہ چھ ماہ کے دوران سوڈان حکومت کی طرف سے اٹھائے گئے مثبت اقدامات کے جواب میں انہوں نے خرطوم پرعاید پابندیوں میں نرمی کا اعلان کیا ہے۔ خرطوم حکومت نے بھی پابندیوں میں نرمی کے امریکی اقدام کا خیر مقدم کرتے ہوئے اسے امریکا کے ساتھ تعلقات کی بحالی کی سمت میں اہم پیش رفت قرار دیا ہے۔

موضوعات:امریکہ سوڈان