سرینگر (این این آئی)مقبوضہ کشمیر میں جموں وکشمیر لبریشن فرنٹ کے غیر قانونی طور پرنظربند چیئرمین محمد یاسین ملک کو میڈیکل چیک اپ کیلئے سرینگر کے ایک ہسپتال لے جایا گیا۔ کشمیرمیڈیاسروس کے مطابق لبریشن فرنٹ کے ترجمان نے سرینگر میں جاری ایک بیان میں کہا ہے کہ محمد یاسین ملک کوہمہامہ میں انتہائی خستہ حالت میں قید تنہائی میں رکھا گیا ہے اور وہ بہت کمزور ہوگئے ہیں جس کی وجہ سے ان کا چیک اپ کرانے کیلئے انہیں سرینگر کے فلورنس ہسپتال لے جایاگیا ۔ ترجمان نے مزید کہاگزشتہ ہفتے ان کے ٹیسٹ خیبر ہسپتال میں کرائے گئے تھے جن کے نتائج درست نہیں آئے تھے ۔ انہوں نے کہاکہ ڈاکٹر سجاد قریشی نے انکا معائنہ کیا اور انہیں دل، گردوں اور دیگر بیماریوں کے حوالے سے بہت سے ٹیسٹ کرانے کا مشور ہ دیا ہے ۔ترجمان نے کہاکہ یاسین ملک کے گردے کی پتھری بڑھ گئی جس کی وجہ سے وہ شدید تکلیف میں مبتلا ہیں۔ ڈاکٹر وں کے مطابق انکی صحت بری طرح متاثر ہوئی ہے اور انہیں ایک ہفتے کے بعد دوبارہ معائینہ کرانے کیلئے کہاگیا ہے ۔ طبی معائینے کے بعد انہیں دوبارہ جوائنٹ انٹیرو گیشن سینٹر ہمہامہ دوبارہ منتقل کردیاگیاہے۔واضح رہے کہ دوروزقبل یاسین ملک کی اہلیہ مشال ملک نے بھارتی فوج کی قید میں ان کے شوہریاسین ملک کی حالت خراب ہے اوروفاقی حکومت سے مطالبہ کیاتھاکہ پاکستان اس معاملے میں کرداراداکرے ۔