اسلام آباد(مانیٹرنگ ڈیسک)بھارتی وزیر اعظم نریندر مودی کا مشہور سوٹ جسے چار کروڑ 31لاکھ31ہزار3سو 11روپے میں نیلام کیا گیا تھا، اسے دنیا کا سب سے مہنگا ترین سوٹ ہونے کا اعزاز حاصل ہو گیا ہے۔اسے گنز ورلڈ ریکارڈ میں شامل کر لیا گیا ہے۔اس حوالے سے گنز ورلڈ ریکارڈ بک نے سرٹیفیکیٹ جاری کردیا ہے۔یہ سوٹ تقریباً دس لاکھ بھارتی روپے میں تیار کیا گیا تھا جسیبھارتی وزیراعظم کے مداح اور تاجر رامیش کمار کی طرف سے انہیں تحفے کے طور پر پیش کیا گیا تھا۔اس سوٹ کو ہیروں کے کاروبار سے وابستہ تاجر لال جی بھائی پاٹل نے خریدا۔
مودی نے جنوری 2015میں امریکی صدر باراک اوباما سے ملتے وقت یہ سوٹ پہن رکھا تھا۔ اس سوٹ پر باریک لائنوں کی صورت میں نریندر مودی کا نام بھی لکھا ہوا تھا۔نیلامی کے ایونٹ کا انعقاد سورت شہر میں کیا گیا تھاجو ہیروں کی کٹائی اور پالش کا مرکز سمجھا جاتا ہے اور مودی کی آبائی ریاست گجرات میں واقع ہے۔نریندر مودی کا یہ سوٹ تین روزہ نمائش میں رکھا گیا تھا۔ اس نمائش میں نریندر مودی کو ملنے والے وہ چار سو تحائف بھی نیلامی کے لیے رکھے گئے تھے جو انہیں وزیراعظم بننے پر دئیے گئے تھے۔اس سوٹ کی نیلامی سے حاصل ہونے والی رقم کو بھارت کے آلودہ ترین دریاؤں میں سے ایک گنگا کی صفائی کے لیے استعمال کیے جانے کا اعلان کیا گیاتھا۔پاٹل کا کہنا تھا، ’ہم اس سوٹ کو اپنے دفتر میں رکھیں گے، یہ ہمیں یاد دہانی کروائے گا کہ ہم نے ایک عظیم مقصد میں حصہ لیا تھا۔‘وزیر اعظم مودی کے اس سوٹ کو مخالفین اور سیاستدانوں کے ساتھ ساتھ سوشل میڈیا پر بھی شدید تنقید کا نشانہ بنایا گیا تھا۔ناقدین کا کہنا تھا کہ عوام بھوکے مر رہے ہیں اور وزیر اعظم نے انتہائی مہنگا سوٹ پہن رکھا ہے۔ اسے خودپسندی کی انتہا قرار دیا گیاتھا۔