واشنگٹن (نیوزڈیسک) امریکی محکمہ خارجہ کے ترجمان مارک ٹونر نے کہا ہے کہ کشمیر کے حوالے سے پالیسی میں کوئی تبدیلی نہیں آئی اور امریکہ کا موقف واضح ہے کہ پاکستان اور بھارت کو مذاکرات کے ذریعے مسئلے کا حل نکالنا ہو گا۔ واشنگٹن میں صحافیوں کو ہفتہ وار بریفنگ دیتے ہوئے مارک ٹونر نے کہا کہ پاکستان اور بھارت دونوں خطے کا اہم ملک ہیں اور امریکہ دونوں ممالک میں بہتر تعلقات کا خواہاں ہے۔ ترجمان امریکی محکمہ خارجہ نے کہا کہ پاکستان میں بھارتی خفیہ ایجنسی ”را“ کے جاسوس کی گرفتاری سے آگاہ ہیں اور تمام ترصورت حال کا بغور جائزہ لے رہے ہیں۔ پانامہ لیکس کے الزامات کے حوالے سے مارک ٹونر نے کہا کہ امریکی محکمہ خزانہ ان الزامات کا باریک بینی سے جائزہ لے رہا ہے تاہم کارروائی کرنا متعلقہ حکومتوں کا کام ہے۔