لندن(نیوزڈیسک)پانامہ پیپرز لیکس نے پاکستان ،چین ،روس،برطانیہ،ملائشیاسمیت بارہ ممالک میں زلزلہ برپاکردیا،بارہ ممالک کے موجودہ اورسابق سربراہان نے دولت باہر منتقل کی ،سپین کے سابق بادشاہ کی بہن سابق چینی وزیراعظم کی بیٹھی کا نام بھی شامل، مصر کے صدر السیسی کے بیٹے نے بھی کالا دھن جمع کیا، برطانوی وزیراعظم کے والد بھی کالادھن جمع کرانے والوں میں شامل نکلے، روسی صدر کے قریبی دوست کا نام بھی شامل ہے، ملائشیاءکے وزیراعظم کا بیٹا بھی دولت چھپانے والوں میں شامل،آذربائیجان کے صدر کا خاندان بھی اس فہرست میں شامل ہے،اس کے علاوہ اس میں ایک ارب ڈالر پر مشتمل کالا دھن سفید کرنے والے ایک گروہ کا بھی ذکر ہے جسے ایک روسی بینک چلاتا ہے اور جس کے روسی صدر ولادی میر پوتن کے قریبی ساتھیوں کے ساتھ روابط ہیں۔ دولت کی ترسیل آف شور کمپنیوں کے ذریعے کی جاتی تھی، جن میں سے دو کے سرکاری طور پر مالک روسی صدر کے قریبی دوست تھے۔موسیقار سرگے رولدوگن لڑکپن سے روسی صدر کے ساتھی ہیں اور وہ پوتن کی بیٹی ماریا کے گاڈ فادر بھی ہیں۔کاغذوں میں رولدوگن نے مشتبہ سودوں میں کروڑوں ڈالر کمائے ہیں۔ لیکن ان کی کمپنیوں کی دستاویزات کے مطابق: ’یہ کمپنی ایک پردہ ہے جس کے قیام کا مقصد اس کے اصل مالک کی شناخت چھپانا ہے۔‘موساک فونیسکا کمپنی کا کہنا ہے کہ وہ ’ہر ممکن احتیاط سے کام کرتی ہے اور اگر اس کی خدمات کا غلط استعمال ہوا ہے تو اسے اس پر افسوس ہے۔’اگر ہمیں کسی مشکوک سرگرمی یا بدمعامل گی کا پتہ چلا تو ہم فوراً اسے حکام کے علم میں لاتے ہیں۔ اسی طرح جب حکام ہمارے پاس کسی قسم کی بدمعاملگی کے شواہد لاتے ہیں تو ہم ہمیشہ ان کے ساتھ بھرپور تعاون کرتے ہیں۔‘موساک فونیسکا کا کہنا ہے کہ آف شور کمپنیاں دنیا بھر میں پائی جاتی ہیں اور انھیں کئی جائز مقاصد کے لیے استعمال کیا جاتا ہے۔