اسلام آباد ( نیوز ڈیسک) امریکہ نے ایک مرتبہ پھر مطالبہ کیاہے کہ پاکستان ایٹمی صلاحیت محدود اور ذخائر کم کرے جبکہ امریکی وزیرخارجہ جان کیری نے ایٹمی اثاثوں کا معاملہ وزیراعظم نوازشریف کیساتھ اٹھانے کااعلان کردیا ۔ ’ٹائمزآف انڈیا‘ کے مطابق امریکہ اور روس کی مثال دیتے ہوئے جان کیری نے کہاکہ پاکستان کو حقیقت سمجھنی چاہیے اور اپنی نیوکلیئرپالیسی پر نظر ثانی کرنی چاہیے ، پاکستانی حکام سے اس ضمن میں بات چیت بھی ہوئی ہے ، پاکستان کو اپنی پالیسی میں میانہ روی اختیار کرناچاہیے۔ جان کیری کا کہناتھاکہ آئندہ ماہ صدر اوباما کی زیرصدارت ہونیوالی نیوکلیئرسیکیورٹی سربراہی کانفرنس میں وزیراعظم نوازشریف کی شرکت متوقع ہے اور دونوں ممالک کو نیوکلیئرسیفٹی سے متعلق تشویش ہے ، توقع ہے کہ ایک ذمہ دارملک ہوتے ہوئے ہم اس معاملے پر بات چیت کرتے رہیں گے۔ جان کیری کے بیان پر ردعمل دیتے ہوئے سرتاج عزیز نے کہاکہ پاکستان کا ایٹمی اسلحہ اس کی ڈھال کیلئے ہے اور ایٹمی پروگرام پر یکطرفہ طور پر کوئی پابندی قبول نہیں کی جائے گی ۔معاملے کو مشرق ومغرب سے مستعار لیے گئے چشموں سے دیکھنا درست نہیں،پاکستان کو اس کی سٹریٹجک سپیس کے اندر برداشت کیا جائے۔انہوں نے کہا کہ امریکہ پاکستان کیسلامتی سے متعلق خدشات کو بہتر طو ر پر سمجھے۔