ریاض (نیوز ڈیسک) ہالی ووڈ، بالی ووڈ لالی ووڈ کی فلمیں کیا عام ہوئیں لوگوں نے جرائم کے نئے نئے طریقے اپنا لئیے۔ایسا ہی کچھ سعودی عرب کی ایک خاتون کی تلاشی لینے پر سامنے آیا ۔
سعودی عرب جیسے ملک میں کسی کے پاس شراب کی ایک بوتل برآمد ہوجانے پر بھی کھلبلی مچ جاتی ہے لیکن ایک سعودی خاتون کی دیدہ دلیری دیکھئے کہ وہ ایک، دو نہیں بلکہ ڈیڑھ ہزار شراب کی بوتلیں لے کر بے فکری کے ساتھ سڑک پر رواں دواں تھی۔ ایک نجی اخبار کے مطابق یہ خاتون شراب کی بڑی مقدار لے کر بحرین سے سعودی عرب میں داخل ہوئی تھی، اور سمگلنگ کا ایسا منفرد طریقہ اختیار کیا تھا کہ سیکیورٹی اہلکار بھی چکرا کر رہ گئے۔ خاتون ایک گاڑی میں سوار تھی جس کے پیچھے ایک 24فٹ لمبی کشتی باندھی گئی تھی۔ اہلکاروں نے جب کشتی کا سکین کیا تو پتہ چلا کہ اس کے پیندے میں شراب کی بوتلیں موجود تھیں۔ کہانی کا اصل حیران کن باب اس وقت شروع ہوا جب بوتلیں نکالی جانے لگیں۔ خاتون کی کشتی میں بوتلوں کو تہہ در تہہ چھپایا گیا تھا، اور ایک کے بعد ایک ڈبہ برآمد ہوتا گیا، حتٰی کہ ان کی گنتی 1504پر جا کر رکی۔ سمگلر خاتون کو کنگ فہد کازوے پر گرفتار کیا گیا، جو بحرین اور سعودی عرب کو ملاتی ہے۔ 25 کلومیٹر پر مشتمل اس سڑک کا افتتاح 1986ء میں کیا گیا اور اسے روزانہ ہزاروں افراد دونوں ممالک کے درمیان آمدورفت کے لئے استعمال کرتے ہیں۔