برسلز(نیوزڈیسک)یورپی کمیشن کے صدر ژاں کلود ینکر نے کہا ہے کہ یورپی یونین سے برطانیہ کے اخراج کو روکنے کے لیے طے پانے والی ڈیل مناسب ہے۔جرمن ریڈیو کے مطابق انہوں نے کہا کہ یہ ڈیل برطانیہ اور یورپی یونین میں شامل دیگر 27 ریاستوں کے لیے ٹھیک ہے۔ یہ بات اہم ہے کہ برطانوی وزیراعظم ڈیوڈ کیمرون نے دھمکی دے رکھی ہے کہ اگر یورپی یونین میں اصلاحات کر کے برطانوی مفادات کا خیال نہ رکھا گیا، تو وہ یورپی یونین میں رہنے یا نکل جانے سے متعلق مجوزہ ریفرنڈم میں یورپی یونین کے خلاف مہم چلا سکتے ہیں۔ اس ڈیل کا خیرمقدم کیمرون نے بھی کیا ہے۔دریں اثناءامریکی صدر براک اوباما نے برطانیہ اوریورپی_یونین کے درمیان تعلق پر ہونے والی گرما گرم بحث میں اپنا حصہ ڈالتے ہوئے برطانوی وزیر اعظم ڈیوڈکیمرون کو بتایا ہے کہ ان کے ملک کو 28 رکنی بلاک کا حصہ رہنے میں ہی بہترین فائدہ ہے۔میڈیارپورٹس کے مطابق امریکی صدارتی دفتر وائٹ ہاﺅس نے بتایا کہ صدر اوباما نے کیمرون کے ساتھ فون پر بات کی اور انہیں بتایا کہ امریکا مضبوط یورپی یونین میں مضبوط برطانیہ کی حمایت جاری رکھے گا۔اوباما نے ایسے موقع پر اپنی رائے کا اظہار کیا ہے کہ جب جون 2016ءمیں یورپی یونین کی رکنیت کے حوالے سے برطانوی ریفرینڈم سے قبل ڈیوڈ کیمرون اپنی جان بخشی کروانے کے لئے برسلز سے کچھ مراعات حاصل کرنے کی کوشش کررہے ہیں۔واشنگٹن نے دنیا کے سب سے بڑے معاشی بلاک میں مرکزی کردار ادا کرنے والے ملک برطانیہ کی دیرپاءحمایت کی ہے اور اس نے خبردار کیا ہے کہ اگر برطانیہ اس بلاک کو چھوڑ دے گا تو یہ بلاک ٹوٹ سکتا ہے۔ڈیوڈ کیمرون ذاتی طور پر یورپی یونین میں رکنیت کے حامی ہیں مگر انہوں نے اپنی جماعت “کنزرویٹو پارٹی” کے مختلف حلقوں کو منانے کی کوشش میں یورپی یونین کے کچھ قوانین میں تبدیلیوں کا مطالبہ کیا ہے۔یورپی یونین کے صدر ڈونلڈ ٹسک نے اس سے قبل برطانیہ کو راضی کرنے کے لئے اپنی تجاویز کو بیان کیا تھا جس کے نتیجے میں مذاکرات کی راہ کھل گئی۔