بغداد (نیوز ڈیسک) عراق اور شام میں برسر پیکار تنظیم داعش سے تعلق رکھنے والے ایک شدت پسند نے اپنے جسم سے ایک کیمرہ باندھ رکھا تھا جس سے وہ لڑائی کے دوران پیش آنے والے واقعات کی عکس بندی کر رہا تھا۔ اس فوٹیج میں اس شدت پسند کو بلڈنگ سے پھلانگتے، بم پھینکتے اور گولیاں چلاتے دیکھا جا سکتا ہے۔داعش کے اس شدت پسند کے ساتھ دیگر ساتھی بھی ہیں جو گولیاں اور بم برسا رہے ہیں۔ فوٹیج کے آخری لمحات میں یہ دہشتگرد ایک گھر میں گھستا ہے اور وہاں اندھا دھند فائرنگ کرنا شروع کر دیتا ہے۔ شدت پسند کی جانب سے گھر کے مختلف کمروں میں فائرنگ کی جاتی ہے لیکن فوٹیج میں نظر آرہا ہے کہ وہاں بظاہر کوئی موجود نہیں ہے۔ یہ شدت پسند جیسے ہی اس عمارت سے باہر نکلتا ہے تو اس کا ساتھی درخت کی آڑ لئے چھت پر موجود کسی شخص پر فائرنگ کرتا نظر آتا ہے۔ دوسرے شدت پسند کی جانب سے چھت پر ہینڈ گرینیڈ بھی پھینکا جاتا ہے۔ صورتحال کو دیکھتے ہوئے فلم بندی کرتا ہوا شدت پسند بھی چھپنے کی کوشش کرتا ہے لیکن چند لمحوں بعد وہ جیسے ہی سر اٹھاتا ہے تو چھت پر موجود شخص کی گولی کا نشانہ بن جاتا ہے۔