لداخ (نیوزڈیسک)مقبوضہ کشمیر کے لداخ ریجن میں برفانی تودہ گرنے سے 4بھارتی فوجی ہلاک ہو گئے ۔اطلاعات کے مطابق لداخ کے جنوب میں واقع ایک گلیشیر میں بھارتی فوج کی تین لداخ سکاﺅٹس رجمنٹ کے 4فوجی اہلکار حوالدار سیوانگ نربو، حوالدار دورجے گیلٹسن، محمد یوسف اور جیگمیڈ چوسدپ گشت کے دوران برفانی تودے تلے زندہ دب گئے ۔ بھارت کے دفاعی ترجمان کرنل ایس ڈی گوسوامی نے اودھمپور میں صحافیوں کو بتایا کہ گزشتہ سال اپریل کے بعد سے تیسری مرتبہ لداخ کے علاقے سیاچن میں برفانی تودے گرنے سے بھارتی فوجی ہلاک ہو ئے ہیں۔ اپریل میں سیاچن کے علاقے چنگ لا میں برفانی تودہ گرنے سے چار فوجی ہلاک ہو گئے تھے ۔گزشتہ سال 15نومبر کو سیاچن گلیشیر میں ایک بھارتی چوکی پر تودہ گرنے سے بھارتی فوج کاکپتان اشونی کمار ہلاک ہوگیا تھا جبکہ 15فوجی اہلکاروں کو بچالیا گیا تھا ۔