نیویارک(نیوزڈیسک) مشتری ہوشیار باش!فیس بک پر آج کل ایک پوسٹ بہت دیکھی جا رہی ہے جس میں کہا گیا ہے کہ فیس بک کے بانی مارک زکربرگ نے بیٹی کی پیدائش پر اپنی 45ارب ڈالر کی جو دولت فلاحی کاموں کے لیے عطیہ کی ہے اس کا ایک حصہ ایسے لوگوں کو دیا جائے گا جو اس پوسٹ کو کاپی کرکے اپنی وال پر شیئر کریں گے اور اس میں اپنے 5سے 10فرینڈز کو ٹیگ بھی کریں گے۔ اس پوسٹ میں لکھا ہوتا ہے کہ فیس بک ان افراد میں سے 1ہزار افراد کا انتخاب کرے گی جن میں 2کروڑ 70لاکھ ڈالر(تقریباً2ارب 75کروڑ روپے)تقسیم کیے جائیں گے۔ لیکن اس پوسٹ کی حقیقت یہ ہے کہ یہ جعل سازوں کا ایک گروپ ہے جو یہ پوسٹ پھیلا رہا ہے۔ جس طرح ٹیکسٹ میسج اور ای میلز کے ذریعے لوگوں کو دھوکہ دیا جاتا ہے اسی طرح یہ لوگ فیس بک پر لوگوں کو دھوکہ دے رہے ہیں۔اس حوالے سے این بی سی نیوز سے گفتگو کرتے ہوئے فیس بک کے ایک ترجمان کا کہنا تھا کہ ”یہ پوسٹ بالکل جھوٹ پر مبنی ہے اور فراڈ کی نیت سے پھیلائی جا رہی ہے، کمپنی کا اس سے کوئی تعلق نہیں۔“لہٰذا اگر آپ ایسی کوئی پوسٹ دیکھیں تو اسے نظرانداز کر دیں، ورنہ آپ کے شیئر کرنے پر آپ کو کہا جائے گا کہ آپ کا نام ان 1ہزار خوش نصیب افراد میں آ گیا ہے لہٰذا اپنی انعامی رقم حاصل کرنے کے لیے اتنی رقم ہمیں بھیج دیجیے۔