لندن (نیوز ڈیسک) داعش نے پیرس میں خوفناک حملوں کے بعد برطانیہ کو نشانہ بنانے کی تیاری شروع کردی ہے اور اس مقصد کے لئے برطانیہ میں اپنے کارندوں کو ایسے خفیہ پیغامات دئیے ہیں کہ یورپی سکیورٹی حکام گھبرا کررہ گئے ہیں۔ برطانوی خفیہ ایجنسیوں کا کہنا ہے کہ اس بار حملوں کے لئے ایک نئی اور کہیں زیادہ خطرناک حکمت عملی استعمال کی جارہی ہے۔ جریدے ڈیلی میل کے مطابق برطانوی انٹیلی جنس اہلکاروں کا کہنا ہے کہ پیرس میں ہونے والے حملوں سے کچھ دن پہلے برطانیہ میں مقیم داعش کے کارندوں کو یہ پیغامات دئیے جارہے تھے کہ عنقریب برطانیہ میں بھی حملے ہونے والے ہیں۔ برطانوی سیکیورٹی اداروں کے مطابق پچھلے کچھ دنوں کے دوران کچھ ایسے خفیہ پیغامات بھی پکڑے گئے ہیں کہ جن میں برطانیہ میں مقیم داعش کے لوگوں کو حکم دیا گیا ہے کہ وہ شام کی طرف سفر کرکے مشکلات میں مت پڑیں بلکہ برطانیہ میں ہی اپنا خفیہ قیام جاری رکھیں، حتیٰ کہ انہیں حملے کا حکم جاری کردیا جائے۔جریدے ڈیلی میل کا کہنا ہے کہ یہ پیغامات پچھلے دو ہفتے کے دوران داعش کے لئے ہمدردی رکھنے والے برطانوی افراد کو بھیجے گئے ہیں۔ ممکنہ حملہ آوروں سے یہ گفت و شنید بھی کی جارہی ہے کہ ان کے پاس کس قسم کے ہتھیار موجود ہیں اور انہیں مزید کس قسم کے ہتھیاروں اور وسائل کی ضرورت ہوگی۔ برطانوی خفیہ اداروں نے خدشہ ظاہر کیا ہے کہ پیغامات کی نوعیت سے ظاہر ہوتا ہے کہ کسی بھی وقت دہشت گردی کا کوئی بڑا واقعہ رونما ہو سکتا ہے۔