نئی دہلی (نیوزڈیسک)بھارت کی انتہا پسندتنظیم شیو سینا نے کہا ہے کہ پاکستان کی طرف سے اس تنظیم کو دہشتگرد قرار دینا ہمارے لئے بڑااعزاز ہے جس پر ہمیں فخر ہے .یہ اعزاز ہمارے لئے بھارت کے سب سے بڑے سر کاری اعزاز مہاویر چکرا سے بڑا ہے ۔یہ بات شیو سینا کے نمائندہ جریدہ سامنا نے اپنے اداریئے میں کہی ہے جس کا عنوان بھی ”شیو سینا کو مہاویر چکرا شکریہ پاکستان “رکھا گیا ہے ۔دفتر خارجہ کے ترجمان نے حالیہ بریفنگ میں کہا تھا کہ عالمی برادری کو شیو سینا کی دہشتگردانہ سرگرمیوں کا نوٹس لینا چاہیے ۔شیو سینا جو بھارت میں حکمران اتحاد کی سب سے اہم جماعت ہے پاکستان اور پاکستانی رہنماﺅں کے خلاف حالیہ دنوں میں شدید مہم چلاتی رہی ہے جس کے دور ان سابق وزیر خارجہ خورشید قصوری کے میزبان اور مقبوضہ کشمیر کے ایک رہنما کے چہرے پر سیاہی پھینکی گئی جبکہ کئی پاکستانی رہنماﺅں اور فنکاروں کو دورے سے روک دیا گیا ۔