کینبرا(نیوز ڈیسک)کینیڈا میں ہنگامی حالات کے ادارے کے مطابق برٹش کولمبیا کے ساحل پر وھیل مچھلی کا نظارہ کرانے والی ایک کشتی کے ڈوبنے سے کم از کم چار افراد ہلاک ہوگئے ہیں۔کوسٹ گارڈز اور ریسکیو حکام کے مطابق یہ کشتی وینکوور جزیرے پر ٹوفکنو کے نزدیک غرقاب ہوئی۔خبر رساں ادارے اے ایف پی اور ایسوسی ایٹڈ پریس کے مطابق اس کشتی پر 27 افراد سوار تھے۔ کشتی پر سوار سیاحوں کا تعلق کن ممالک سے ہے اس کا علم ابھی نہیں ہے۔مقامی میڈیا نے صحت کے حکام کے حوالے سے کہا ہے کہ حادثے میں اب تک چار افراد کی موت کی تصدیق ہوئی ہے تاہم کشتی کے غرقاب ہونے کی وجوہات سامنے نہیں آئی ہیں۔برٹش کولمبیا کورونر کی ترجمان بارب میک لنٹوک نے خبررساں ادارے اے پی کو ’متعدد ہلاکتوں‘ کے بارے میں بتایا ہے۔ انھوں نے مزید کہا کہ ابھی امدادی کام جاری ہے اس لیے قطیعت کے ساتھ یہ نہیں کہا جا سکتا کہ کتنی ہلاکتیں ہوئی ہیں۔کینیڈا کی نیوز سروس سی بی سی کے مطابق نو افراد کو پانی سے نکال کر ہسپتال منتقل کیا گیا ہے۔ سی بی سی کے مطابق کشتی سمندر میں ساحل سے قدرے فاصلے پر ڈوبی ہے۔کینیڈا کی میڈیا کے مطابق یہ کشتی جیمی کی وھیلینگ سٹیشن اینڈ ایڈونچر سینٹر کے تحت چلائی جا رہی تھی اور اس کا فشنگ سیزن رواں ماہ کے آخر میں ختم ہونا تھا جبکہ ان کی سمندری سیر کی خدمات گذشتہ 30 سال سے جاری ہیں۔اطلاعات کے مطابق جب کشتی ڈوبی اس وقت سمندر پرسکون تھا اور سورج چمک رہا تھا۔ وھیل مچھلی کا نظارہ دیکھنے کے لیے ٹوفینو سیاحوں کی مقبول منزل ہے اور کشتی کا یہ سفر عام طور پر تین گھنٹوں پر محیط ہوتا ہے۔