ماسکو (نیوزڈیسک) روس نے شام میں ایک ہسپتال پر فضائی حملے سے متعلق خبرکی تردید کرتے ہوئے اسے جھوٹ پر مبنی قرار دیا ہے ۔ روسی وزارت خارجہ کی جانب سے جاری بیان میں سیریئن آبزرویٹری فار ہیومن رائٹس کو بھی ان رپورٹوں کے تناظر میں شدید تنقید کا نشانہ بناتے ہوئے کہا گیا ہے کہ یہ تنظیم قابل اعتبار نہیں۔بیان میں کہا گیا ہے کہ اس سلسلے میں سامنے آنے والی تمام رپورٹس غلط ہیں۔واضح رہے کہ تین روز قبل سیریئن آبزرویٹری فار ہیومن رائٹس نے کہاتھا کہ مغربی شامی صوبے ادلیب کے ایک ہسپتال پر روسی فضائی حملے میں کم از کم 13 افراد ہلاک ہوئے جن میں ہسپتال کے عملے کے ارکان بھی شامل تھے۔دریں اثناءروسی صدر ولادی میر پیوٹن نے الزام لگایا ہے کہ مغربی ممالک شام میں دوہرا کھیل کھیلنے میں مصروف ہیں۔ سیاسی ماہرین کے گروپ سے اپنے خطاب میں ولادی میر پیوٹن نے کہا کہ مغرب کا رویہ مختلف دہشت گرد گروہوں کے ساتھ مختلف ہے۔انہوں نے کہاکہ یہ ہمیشہ سے ایک مشکل عمل ہے کہ ایک دوہرا کھیل کھیلا جائے۔انہوں نے کہا کہ ایک طرف دہشت گردوں کے خلاف جنگ کا اعلان کیا جائے اور دوسری جانب کچھ کو جگہ مہیا کی جائے تاکہ مشرق وسطیٰ میں اپنے ذاتی مفادات کو تحفظ فراہم کیا جا سکے۔انہوں نے شام میں روسی عسکری مداخلت کا دفاع کرتے ہوئے کہا کہ روسی کارروائیوں کا مقصد شام میں سیاسی طور پر مسئلے کو حل کرنے کے حالات پیدا کرنا ہے تاہم انہوں نے واضح الفاظ میں کہا کہ روس اعتدال پسند یا شدت پسند دہشت گردوں میں فرق نہیں کرے گا۔ انہوں نے مزیدکہا کہ روسی اور امریکی فوجوں کے درمیان رابطے بحال ہو چکے ہیں اور دہشت گرد گروہوں سے متعلق معلومات کے تبادلے کا سلسلہ جلد شروع ہو جائےگا۔