اسلام آباد(نیوز ڈیسک)ترک فوج نے شامی سرحد کے قریب ایک نامعلوم ڈرون طیارہ مار گرایا ہے۔ ترک فوجی ذرائع کے مطابق بغیر پائلٹ کے اس طیارے کو کیلس نامی علاقے میں نشانہ بنایا گیا ہے۔بتایا گیا ہے کہ جیسے ہی یہ طیارہ ترک فضائی حدود میں داخل ہوا تو اسے تین مرتبہ خبردار کیا گیا۔ تاہم وارننگ کی پروا نہ کرنے کے بعد اس کو گرایا گیا۔نام ظاہر نہ کرنے کی شرط پر ایک امریکی عہدیدار نے برطانوی خبر رساں ادارے ‘رائیٹرز’ کو بتایا کہ ان کا ماننا ہے کہ یہ روسی طیارہ تھا۔ لیکن روسی وزارت دفاع کا کہنا ہے کہ اس کے تمام طیارے بحفاظت شام میں اپنے اڈے پر واپس آچکے ہیں اور ترکی کی طرف سے طیارہ تباہ کرنے کے اعلان کے بعد اس کے ڈرونز بھی “منصوبے کے مطابق” سرگرم ہیں۔ترکی اس سے قبل بھی شام کی چار سالہ خانہ جنگی کے دوران اپنی فضائی حدود کی خلاف ورزی پر شام کے طیاروں اور ہیلی کاپٹروں کو نشانہ بنا چکا ہے۔ حال ہی میں ترکی نے دو مرتبہ یہ شکایت کی تھی کہ روس کے لڑاکا طیاروں نے اس کی حدود کی خلاف ورزی کی ہے۔ماسکو نے دو ہفتے قبل ہی شام میں صدر بشار الاسد کی حکومت سے برسرپیکار عناصر کے خلاف فضائی کارروائیاں شروع کی تھیں۔