نئی دہلی ( نیوزڈیسک)”ہم دہشتگرد ہیں تو تم کون سے دودھ کے دھلے ہو؟”شیو سینا بھارتی وزیراعظم کے بیان پر برہم ،نریندرا مودی کو گجرات فسادات سے متعلق ماضی یاد دلادیا۔بھارتی خبر رساں ادارے کی رپورٹ کے مطابق بھارتی وزیراعظم نریندرا مودی کے شیو سینا کی دھمکیوں کے باعث غلام علی کا کنسرٹ منسوخ کرنے اور اتر پردیش میں مسلمان اخلااق احمد کو گائے کا گوشت کھانے کے شبہ میں شہید کرنے کے مذمتی بیان پر برہم انتہا پسند ہندو تنظیم شیوسینا نے مودی کو اس کا گجرات فسادات سے متعلق بھیانک ماضی یاد دلاتے ہوئے کہاہے کہ ”ہم دہشتگرد ہیں تو تم کون سے دودھ کے دھلے ہو!!”۔شیو سینا کے لوک سبھا رکن سنجے رائوٹ نے پریس کانفرنس کے دوران کہاکہ غزل گائیک غلام علی خان کا کنسرٹ منسوخ کرنا افسوسناک نہیں بلکہ وزیراعظم کا بیان افسوسناک ہے ۔انہوں نے کہاکہ مودی کی ریاست گجرات کے شہروں احمد آباد اور گودھرامیں مسلمانوں کے قتل عام کی لیڈرشپ کی مہارت اور مضبوط ہندو توا سے بھارت سمیت پوری دنیا واقف ہے ۔انہوں نے کہاکہ ان واقعات کے بعد ہر ایک اس بات سے بخوبی واقف ہے کہ مودی ایک قوم پرست اور بھارت کو صرف ہندوئوں کا ملک بنانے کیلئے لڑنے والے ہیں ۔انہوں نے کہاکہ مودی نے یہ بیان اس لیے دیا کہ وہ وزیراعظم ہیں ، اگر وہ صرف نریندرا مودی ہوتے تو وہ اس طرح کے بیانات کبھی نہ دیتے