لندن(نیوزڈیسک) پانچ سال میں بھارتی شہریت حاصل کرنے والے غیر ملکیوں میں پاکستانی سرِفہرست ہیں۔بھارتی حکومت کی جانب سےبرطانوی ریڈیو کو فراہم کی جانے والی معلومات سے پتہ چلا ہے کہ سنہ 2011 سے 2015 کے درمیان پناہ کے متلاشی 1400 پاکستانیوں کو بھارتی شہریت دی گئی ہے۔روزنامہ جنگ کی رپورٹ کے مطابق بھارتی شہریت حاصل کرنے والوں میں زیادہ تر صوبہ سندھ سے تعلق رکھنے والے ہندو ہیں۔ ان کا دعویٰ تھا کہ انھیں پاکستان میں انتہا پسند اسلامی تنظیموں کی جانب سے خطرات لاحق ہیں۔بھارت میں اب تک پناہ لینے والے کل پاکستانیوں کی حتمی تعداد کے بارے میں کوئی سرکاری اعداد وشمار تو سامنے نہیں آئے لیکن گذشتہ پانچ سالوں میں صوبہ سندھ سے سینکڑوں کی تعداد میں ہندو بھارت میں پناہ لے چکے ہیں۔تاہم پاکستانی ہندوؤں کا کہنا ہے کہ بھارت نے زیادہ تر لوگوں کو شہریت نہیں دی۔ –