لندن (نیوز ڈیسک) برطانوی ڈرونز کے حملوں میں ایک سال کے دوران داعش کے کم وبیش200جنگجو ہلاک ہوئے، ڈرونز حملوں کی اس کامیابی کے پیش نظر وزیراعظم ڈیوڈ کیمرون نے داعش سے نمٹنے کیلئے مزید ڈرونز خریدنے اور ایس اے ایس کو مضبوط کرنے کیلئے ڈرونز کی تعداد دگنی کرنے کا اعلان کیا ہے۔ ڈیوڈ کیمرون نے انکشاف کیا کہ برطانیہ دہشت گرد گروپ کو شکست دینے کیلئے ایلیٹ سپیشل فورسز کو مزید مضبوط بنانے کیلئے امریکہ سے 20نئے اعلیٰ ٹیکنالوجی کے حامل ڈرونز خریدے گا۔ ڈیلی سٹار سے باتیں کرتے ہوئے ایک فوجی ذریعے نے بتایا کہ ایس اے ایس کے چھاپہ ماروں نے داعش کے درجنوں اعلیٰ اور متوسط درجے کے کمانڈروں کو ہلاک کیا ہے جس سے دہشت گردوں کے خلاف بھاری نفسیاتی اثرات مرتب ہوئے ہیں۔