کیو (نیوز ڈیسک) یوکرین کے صدر پٹرو پوروشنکو نے پیرس میں روس، فرانس اور جرمنی کے رہنماوں کے ساتھ مشرقی یوکرین میں امن عمل کا جائزہ لینے کے بعد ’محتاط انداز میں امید‘ کا اظہار کیا ہے۔ پوروشنکو نے روسی صدر ولادیمر پوٹن، فرانس کے صدر فرانسو اولاند اور جرمن چانسلر انجیلا مرکل کے ساتھ پیرس میں منعقدہ کانفرنس میں شرکت کی۔ یہ فروری میں منسک میں ہونے والے امن معاہدے کے بعد ان رہنماوں کی پہلی ملاقات تھی۔ یہ امن معاہدہ مشکلات کا شکار رہا لیکن حالیہ ہفتوں میں اس میں بہتری کے آثار رونما ہونا شروع ہوئے اور اسی ہفتے ایک اور معاہدے کے تحت اگلے مورچوں سے بھاری اسلحہ اور ٹینکوں کی واپسی کا کہا گیا۔ روسی کی خبر ایجنسیوں کے مطابق ملاقات کے بعد پوروشنکو کا کہنا تھا کہ ان کی حکومت ہفتہ کو اس واپسی کا آغاز کرے گی۔ پیوٹن کے ترجمان نے اسلحے کی واپسی کے اس اقدام کو ’مثبت پیش رفت‘ قرار دیا۔ مزید برآں مشرقی یوکرین میں روس کے حمایت یافتہ علیحدگی پسندوں کے علاقے میں مقامی انتخابات بھی تین ماہ کے لیے ملتوی کر دیے گئے ہیں۔ فرانس کے صدر اولاند کا کہنا تھا کہ ’ہم مشرقی یوکرین میں ایسے انتخابات نہیں چاہتے جو منسک معاہدے کے برعکس ہوں۔