اسلام آباد (نیوز ڈیسک)دنیا بھر کے صحافی حالات و واقعات کا تجزیہ کرکے آئندہ سیاسی، معاشی و معاشرتی حالات کی پیش گوئی تو کرتے رہتے ہیں لیکن ایک عرب صحافی نے اپنی ہی موت کی پیش گوئی کرکے دنیا میں تہلکہ مچا دیا ہے۔ اردن کے شہرت یافتہ صحافی نائف المانی نے ایک ویڈیو کے ذریعے اپنی موت کی پیش گوئی کی اور اگلے ہی دن59سال کی عمر میں ہارٹ اٹیک کے باعث اس کی موت واقع ہو گئی۔
یہ ویڈیو اردن کے ایک اخبار نے یوٹیوب پر اپ لوڈ کی ہے جس میں نائف المانی سکرین کے سامنے آتے ہیں اور کہتے ہیں کہ میں آپ سے اور اپنے ادارے کے حکام سے کسی بھی ڈر کے بغیر کہنا چاہتاہوں کہ اگر زندگی رہی تو کل دوبارہ ملاقات ہو گی اور اگر میں زندگی کی بازی ہار گیا تو آپ یاد رکھیے گا کہ میں نے کیا کہا کیونکہ میں اس وقت اپنی موت کو قریب محسوس کررہاہوں ۔
