ریاض (نیوزڈیسک) سعودی عرب نے نئے اسلامی سال کے آغاز سے غیر ملکیوں کو اقامہ کی جگہ شناختی کارڈ جاری کرنے کا اعلان کیا ہے، جس کی معیاد 5 سال ہوگی،سعودی عرب میں مقیم غیر ملکیوں کو یکم محرم 1437ھ سے اقامہ کارڈ کا متبادل ، شناختی کارڈ 5برس کیلئے جاری ہو گا۔ ولی عہد نائب وزیراعظم و وزیرداخلہ شہزادہ محمد بن نایف نے محکمہ پاسپورٹ کے آن لائن پروگرام کا افتتاح کر دیا۔ اس موقعے پر وزیر مملکت و رکن کابینہ ڈاکٹر سعد الجبری اور محکمہ پاسپورٹ کے ڈی جی میجر جنرل سلیمان الیحییٰ اور محکمے کے کئی عہدیدار بھی موجود تھے۔ تفصیلات کے مطابق اقامہ کارڈ کا نام تبدیل کرنے کا فیصلہ کر لیا گیا ہے جسے عربی میں رخصہ اقامہ کہا جاتا تھا اب اس کی جگہ (ہویہ مقیم ) غیر ملکیوں کا شناختی کارڈ جاری کیا جائیگا۔ اس کارڈ کی معیاد میں توسیع ایک یا دو برس کیلئے خود کار نظام کے تحت ہوگی جبکہ شناختی کارڈ میں کسی قسم کی تبدیلی نہیں ہو گی۔ تارکین وطن شناختی کارڈ کی باقی ماندہ مدت سے متعلق معلومات آن لائن حاصل کر سکیں گے۔ شناختی کارڈ میں توسیع کے وقت نیا کارڈ بنوانے کی ضرورت نہیں پڑے گی۔