ریاض (نیوزڈیسک) سعودی عرب نے قطیف کی مسجد میں حملہ کرنےوالے خود کش بمبار کی شناخت کرلی۔ سعودی وزارت داخلہ کی جانب سے جاری بیان کے مطابق لیبارٹری تجزیئے کے بعد خود کش حملہ آور کی شناخت صالح بن عبدالرحمن کے نام سے ہوئی ہے جو سعودی شہری تھا۔ صالح بن عبدالرحمن داعش کے دہشتگرد سیل سے تعلق کی وجہ سے پہلے بھی سیکیورٹی اداروں کو مطلوب تھا۔ سیکیورٹی اداروں نے پچھلے ماہ اس دہشتگرد سیل کا پتا چلایا تھا اور اب تک اس کے 26ارکان کو گرفتار کیا جا چکا ہے۔ قطیف کی مسجد میں نماز جمعہ کے موقع پرخودکش حملے کے نتیجے میں21افرادجاں بحق اور متعدد زخمی ہوگئے تھے۔