ترال (نیوزڈیسک) پاکستان زندہ باد کے نعروں سے سیخ پا ہونے والی بھارتی سرکار اور میڈیا آج ایک بار پھر تلملا اٹھا جب مقبوضہ وادی کے شہر ترال میں نکلنے والی ریلی میں ہر طرف پاکستانی پرچموں کی بہار دکھائی دی۔ سینئر حریت رہنما سید علی گیلانی کی زیر قیادت اس ریلی میں پاکستان زندہ باد کے نعرے بھی گونجتے رہے۔ بھارتی میڈیا سیکڑوں کشمیریوں کو پاکستانی پرچم لہراتا دیکھ کر حسب عادت ، حسب روایت آگ بگولا ہوتا رہا۔ بھارتی ظلم وستم کا شکار کشمیریوں کی جانب سے پاکستانی پرچم لہرائے جانے کا یہ پہلا واقعہ نہیں۔ پندرہ اپریل کو بھی مقبوضہ وادی پاکستان زندہ باد کے نعروں سے گونجتی رہی۔ اس ریلی میں حریت رہنما مسرت عالم نے خوب نعرے لگائے۔ گزشتہ ماہ خاتون حریت رہنما آسیہ اندرابی نے یوم پاکستان پر سجی محفل میں پاکستانی پرچم آویزاں کیا۔ مقبوضہ کشمیر میں بھارت جس طرح کشمیریوں کو دبانے کیلئے زور لگا رہا ہے۔ آزادی کے متوالے کشمیری اسی جوش وخروش کے ساتھ اپنی آواز بلند کر رہے ہیں۔