اسلام آباد(نیوز ڈیسک)امریکی شہر بالٹی مور میں سیاہ فام نوجوان کے قتل کے خلاف فلاڈیلفیا میں احتجاج کے دوران پولیس اور مظاہرین گتھم گتھا ہوگئے۔ پولیس کا کہنا ہے کہ بالٹی مور میں کرفیو رواں ہفتے کے اختتام تک جاری رہے گا۔ بالٹی مور میں پولیس حراست کے دوران سیاہ فام نوجوان فریڈی گرے کے قتل کے خلاف امریکا کے مختلف شہروں میں احتجاج کا سلسلہ جاری ہے۔ بالٹی مور میں مظاہرین نے پولیس مظالم کے خلاف احتجاجی ریلی نکالی، جبکہ فلاڈیلفیا میں بھی متاثرہ خاندان سے اظہار یکجہتی کے لیے سیکڑوں افراد سڑکوں پر نکل آئے۔ اس دوران بعض مظاہرین پولیس سے لڑ پڑے۔ پولیس اور مظاہرین آپس میں گھتم گھتا ہوگئے۔ دوسری جانب پولیس نے نوجوان کے موت کے واقعے کی تحقیقات مکمل کرکے رپورٹ چیف پراسیکیوٹر بالٹی مور کو پیش کردی ہے۔ پولیس کا کہنا ہے کہ مزید احتجاجی مظاہروں کے پیش نظر شہر میں کرفیو رواں ہفتے کے اختتام تک جاری رہے گا۔ بالٹی مور میں منگل کو ہنگاموں کے بعد رات کو کرفیو لگا دیا گیا تھا ۔