اٹاوا(نیوزڈیسک)کینیڈا بھارت کو 28 کروڑ ڈالر مالیت کا یورینیم فراہم کرے گا، اس سلسلے میں دونوں ملکوں کے درمیان معاہدہ طے پاگیا ، اس بات کا اعلان اوٹاوا میں بھارتی وزیر اعظم نریندر مودی اور کینیڈا کے وزیر اعظم اسٹیفن ہارپر نے ملاقات کے بعد مشترکہ بیان میں کیا ، معاہدے کے تحت کینیڈا آئندہ 5برسوں کے دوران بھارت کے ایٹمی ری ایکٹرز کے لیے یورینیم ایندھن فراہم کرے گا ، اس سلسلے میں کینیڈا کے ادارے ’کیمکو کارپوریشن‘ کے ساتھ 28 کروڑ ڈالر مالیت کا ایک معاہدہ طے پاگیا ہے ، اس موقع پر نریندر مودی کا کہنا تھا کہ یورینیم معاہدے سے بھارت اور کینیڈا کے درمیان نئے تعلقات کا آغاز ہوا ہے۔بھارتی وزیراعظم نریندر مودی اس وقت کینیڈا کے دورے پر ہیں اور گزشتہ 42 سال کے دوران کسی بھارتی وزیراعظم کا کینیڈا کا پہلا دورہ ہے، اپنے دورے کے دوران بھارتی وزیر اعظم نے کینیڈین ہم منصب اسٹیفن ہارپر کے ساتھ کامیاب مذاکرات کیے ہیں۔ اس حوالے سے دونوں وزرائے اعظم کا ایک مشترکہ بیان جاری کیا گیا ہے۔جس کے مطابق دونوں ممالک یورینیم سپلائی ڈیل پر رضامند ہوگئے ہیں، کینیڈا کی کامیکو کارپوریشن اگلے5 سال تک بھارتی ری ایکٹرز کیلیے لاکھوں ڈالر مالیت کا یورینیم فراہم کرے گی۔یورینیم کی فراہمی اسی سال شروع ہو جائیگی، بھارتی وزیراعظم مودی کا کہنا ہے کہ 35 کروڑ ڈالر کے معاہدہ سے اندازہ لگایا جا سکتا ہے کہ دونوں ممالک میں باہمی اعتماد اور بھروسہ کس بلندی پر گیا ہے۔ مودی نے اعلان کیا کہ کینیڈینز کو آن لائن ویزہ جاری کردیا جایا کریگا اور ویزہ 10 سال کے لئے ہو گا،جی 20 میں بھی ہماری پارٹنرشپ جاری رہے گی۔ کینیڈا ہمارا قدرتی اتحادی ہے، کینیڈا کا درد ہمارا درد ہے جب کینیڈا میں دہشت گردی کا واقعہ ہوا تھا تو ہم نے بہت تکلیف محسوس کی تھی، کینیڈا زندگی کے ہر شعبے میں ہمارا پارٹنربن سکتا ہے