دبئی سٹی (مانیٹرنگ ڈیسک) متحدہ عرب امارات میں ایک نائجیرین خاتون کو لوٹنے کے بعد معصوم بن کر اسی خاتون کو ڈاکو قرار دینے والے ایک پاکستانی لٹیرے نے پولیس کو بھی پریشان کر دیا۔

دبئی کرمنل کورٹ کو بتایا گیا ہے کہ نائجیریا کی 28 سالہ خاتون البراہا کے علاقہ میں اپنے گھر واپس جارہی تھی کہ اس کے آگے چلنے والے دو مردوں نے اچانک پیچھے مڑ کر اس کا پرس چھیننے کی کوشش شروع کردی۔ خاتون نے لٹیروں میں سے ایک کو پکڑ کر شور بلند کردیا جس کے بعد ایک شخص فرار ہوگیا جبکہ قریب موجود عمارت کے دوسرے فلور پر موجود ایک شخص نے نیچے اتر کر ایک لٹیرے کو پکڑلیا۔ اس دھینگا مشتی کے دوران خاتون کا لباس بھی پھٹ گیا اور اس کو چہرے پر زخم بھی آئے۔

جب پولیس موقع پر پہنچی تو خاتون کو لوٹنے کی کوشش کرنے والے شخص نے حیران کن موقف اختیار کرتے ہوئے بتایا کہ افریقی خاتون ڈاکو ہے اور وہ اس کے ظلم کا نشانہ بن چکا تھا۔ کچھ ابتدائی گومگو اور پریشانی کے بعد بلآخر پولیس نے ملزم کو حراست میں لے لیا۔ عدالت میں مقدمہ زیر سماعت ہے جبکہ پولیس مفرور شخص کی بھی تلاش کررہی ہے۔ عدالت اگلی سماعت 23 اپریل کو کرے گی۔