کراچی(نیوز ڈیسک)یمن میں پھنسے پاکستانی خاندان کی جانب سے مدد کی اپیل چلائی، وزیراعظم نے بھی خبر کا نوٹس لیتے ہوئےجنگ زدہ ملک میں مقیم ہم وطنوں کی فوری مدد اور انخلاء کی ہدایت کردی۔
یمن خانہ جنگی کی لپیٹ میں ہے، صنعا ایئرپورٹ پر حملے کے بعد سیکڑوں پاکستانی پھنس گئے، پاکستانی ميڈيا پر پہلی بار سماء نے جمن میں پھنسے پاکستانی خاندان سے گفتگو کی، عاطف اعجازی اور ان کا خاندان انتہائی سنگین صورتحال سے دوچار ہے۔
عاطف اعجازی اور ان کے اہل خانہ کا کہنا ہے کہ پڑوس کے مکانات تباہ ہوچکے ہیں، روزانہ بے تحاشہ بمباری ہورہی ہے جس کی وجہ سے جانوں کو شدید خطرات لاحق ہیں، کوئی محفوظ ٹھکانہ نہیں ہے، ہماری جان بچائی جائے۔
عاطف اعجاز کا کہنا تھا کہ ہم حالت جنگ میں ہیں،مسلسل بمباری سے زمینی راستے بہت خطرناک ہوچکے ہیں، حکومت سے درخواست ہے ہماری مدد کرے۔
عاطف اعجازی کی اہلیہ نے سماء سے گفتگو کرتے ہوئے کہا کہ ہم بہت پریشان ہیں، ہمیں یہاں سے نکالا جائے، یمن میں پاکستانی سفارتخانہ تعاون کررہا ہے، حکومت پاکستان ہمارے لئے کچھ کرے۔
وزیراعظم نواز شریف نے سماء کی خبر کا نوٹس لیتے ہوئے یمن میں پھنسے پاکستانیوں کے فوی انخلاء کی ہدایت کردی، ترجمان وزیراعظم ہاؤس کا کہنا ہے کہ یمن میں ریاستی نظام ختم ہوچکا ہے، وہاں پاکستانیوں کو اغواء سمیت مختلف خطرات کا سامنا ہے، وزیراعظم نے حکام کو جنگی بنیادوں پر اقدامات کی ہدایت کرتے ہوئے کہا ہے کہ پاکستانیوں کی حفاظت اور انخلاء یقینی بنایا جائے
