اسلام آباد (نیوز ڈ یسک)ایئرپورٹ ذرائع کے مطابق لاہور سے دبئی روانہ ہونے والی ایک غیر ملکی پرواز کو دورانِ پرواز واپس لاہور ایئرپورٹ اتار لیا گیا۔
ذرائع کا کہنا ہے کہ امارات ایئر لائن کی پرواز ای کے 623 لاہور سے روانگی کے بعد فضا ہی میں تھی کہ اسے واپس موڑ کر لاہور ایئرپورٹ پر لینڈ کروا دیا گیا۔ اس پرواز میں 100 سے زائد مسافر سوار تھے۔رپورٹس کے مطابق دبئی انٹرنیشنل ایئرپورٹ کے قریب ڈرون حملے کے باعث فضائی آپریشن شدید متاثر ہوا۔ حملے کے نتیجے میں ایک فیول ٹینک میں آگ بھڑک اٹھی جس کے بعد حفاظتی اقدامات کے تحت ایئرپورٹ پر پروازوں کی آمد و رفت عارضی طور پر روک دی گئی۔اس صورتحال کے باعث متعدد بین الاقوامی پروازیں متاثر ہوئیں، جن میں سے کچھ کو راستے میں ہی روک دیا گیا جبکہ کئی طیاروں کو اپنے روانگی کے مقامات کی جانب واپس بھیج دیا گیا یا متبادل ایئرپورٹس کی طرف موڑ دیا گیا۔اطلاعات کے مطابق آگ کئی گھنٹوں تک لگی رہی تاہم بعد ازاں سول ڈیفنس کے عملے نے اسے قابو میں کر لیا۔
ابتدائی مرحلے میں تمام پروازیں معطل کر دی گئی تھیں، تاہم بعد میں محدود پیمانے پر فضائی آپریشن دوبارہ بحال کر دیا گیا۔عالمی خبر رساں ادارے کے مطابق دبئی ایئرپورٹ پر اب جزوی طور پر فلائٹ آپریشن جاری ہے، تاہم اب بھی کچھ پروازیں تاخیر کا شکار یا منسوخ ہو رہی ہیں جبکہ کئی طیاروں کو المکتوم انٹرنیشنل ایئرپورٹ سمیت دیگر متبادل مقامات کی طرف منتقل کیا جا رہا ہے۔
