ٹوئٹر کے شریک بانی اور دیگر ملازمین کو داعش کی جانب سے دھمکیاں ملنے کا انکشاف ہوا ہے جس کے بعد امریکی قانون نافذ کرنے والے اداروں نے تحقیقات کا آغاز کر دیا ہے۔ داعش کے حامیوں نے گزشتہ روز ایک آن لائن پوسٹ کے ذریعے ٹوئٹر اور اس کے ملازمین پر حملوں اور ان کے قتل کی دھمکیاں دی ہیں۔ ٹوئٹر نے بیان میں کہا ہے کہ ان کی سکیورٹی ٹیم قانون نافذ کرنے والے حکام کے ساتھ مل کر دھمکیوں کے حوالے سے تحقیقات کررہی ہے۔سی این بی سی کی رپورٹ میں کہا گیا ہے کہ ایک دھمکی ٹوئٹر کے شریک بانی جیک دورسے کو دی گئی۔ داعش نے جدید ٹیکنالوجی کا استعمال کرتے ہوئے سوشل میڈیا تک رسائی حاصل کررکھی ہے اور وہ یہاں پر ہر قسم کی ویڈیوز اپ لوڈ کرتے ہیں۔