اسلام آباد (نیوز ڈیسک) دنیا بھر میں میاں بیوی ایک دوسرے کے لیے پیار بھرے نام رکھتے ہیں، مگر ترکیے میں ایک شوہر کا دیا گیا نام اس کے لیے مصیبت کا سبب بن گیا۔
غیر ملکی میڈیا کے مطابق ترکی کے شہر اوشاک میں ایک دلچسپ مگر سنجیدہ نوعیت کا مقدمہ اس وقت سامنے آیا جب ایک خاتون نے اپنے شوہر کے خلاف طلاق کا دعویٰ دائر کیا۔ مقدمے میں بتایا گیا کہ شوہر نے بیوی کا نمبر موبائل فون میں ترکی زبان کے لفظ “ٹومبک” سے محفوظ کیا تھا، جس کا مطلب “موٹی” ہے۔
خاتون نے عدالت میں مؤقف اختیار کیا کہ شوہر کی جانب سے رکھا گیا یہ نام توہین آمیز ہے اور اس سے اس کی عزتِ نفس کو شدید ٹھیس پہنچی ہے۔ انہوں نے طلاق کے ساتھ ساتھ ذہنی اور اخلاقی نقصان کے ازالے کے لیے معاوضے کا مطالبہ بھی کیا۔
عدالت نے مقدمے کا فیصلہ سناتے ہوئے کہا کہ بیوی کے لیے ایسا لفظ استعمال کرنا محض مذاق نہیں بلکہ یہ جذباتی اذیت اور نفسیاتی تشدد کے زمرے میں آتا ہے، جو ازدواجی تعلقات کو نقصان پہنچا سکتا ہے۔ عدالت نے شوہر کو سابقہ اہلیہ کو ہرجانہ ادا کرنے کا حکم دے دیا۔
ترکی کی عدالت کے اس فیصلے کے بعد سوشل میڈیا پر وسیع بحث شروع ہوگئی۔ کئی صارفین نے عدالت کے فیصلے کو سراہا، جبکہ کچھ کا کہنا تھا کہ “موٹی” ایک پیار بھرا نک نیم بھی ہو سکتا ہے، لہٰذا اسے توہین کے زمرے میں نہیں لانا چاہیے۔
