اسلام آباد (نیوز ڈیسک) — دنیا کے تیسرے امیر ترین شخص اور ایمازون کے بانی جیف بیزوس آئندہ ہفتے دوسری شادی کے بندھن میں بندھنے جا رہے ہیں۔ برطانوی اخبار ڈیلی ٹیلی گراف نے اپنی رپورٹ میں دعویٰ کیا ہے کہ جیف بیزوس اور ان کی منگیتر لورین سانچز کی شادی پر 16 ملین ڈالرز (تقریباً ساڑھے 4 ارب پاکستانی روپے) سے زیادہ خرچ کیے جائیں گے۔
یہ شاہانہ تقریب اٹلی کے تاریخی شہر وینس میں جون کے آخری ہفتے میں منعقد ہوگی۔ یاد رہے کہ بیزوس اور سانچز کی منگنی 2023 میں ہوئی تھی۔ اس شادی کی وجہ سے وینس کے رہائشیوں میں شدید تحفظات پائے جا رہے ہیں، اور بعض شہریوں نے بیزوس کی آمد کے خلاف احتجاج بھی کیا ہے۔
مقامی باشندوں کا کہنا ہے کہ اس طرح کی پرتعیش تقریبات سے وینس جیسے قدیم شہر کی تاریخی اور ثقافتی شناخت متاثر ہو رہی ہے۔ ان کا مؤقف ہے کہ شہر کو سیاحت کی نذر کیا جا رہا ہے، جب کہ وہاں کے مقامی افراد رہائش، مہنگائی اور بنیادی سہولیات کی شدید قلت کا شکار ہیں۔
61 سالہ بیزوس شادی کی تقریبات کے لیے اپنی دیوقامت لگژری یاٹ کے ذریعے وینس پہنچیں گے، جس پر وہ پہلے ہی 500 ملین ڈالرز خرچ کر چکے ہیں۔
میڈیا رپورٹس کے مطابق شادی کی تقریبات کا باقاعدہ آغاز 24 جون 2025 سے ہوگا۔ تقریب میں بل گیٹس، ایلون مسک، مارک زکربرگ اور دیگر ہالی وڈ ستاروں سمیت کئی اہم شخصیات کی شرکت متوقع ہے۔
مہمانوں کے لیے وینس کے مہنگے ترین ہوٹلوں میں کمرے بک کیے جا چکے ہیں۔ رپورٹ کے مطابق، شادی کی تقریبات Palazzo Pisani Moretta، Excelsior ہوٹل اور دیگر تاریخی عمارات میں منعقد ہوں گی۔
شادی پر ہونے والے اخراجات کی تفصیل کچھ یوں ہے:
10 لاکھ ڈالرز صرف پھولوں اور سجاوٹ پر خرچ ہوں گے۔
30 لاکھ ڈالرز ایونٹ پلانرز اور انتظامیہ کے لیے مختص ہیں۔
عمارات کے کرائے کی مد میں 20 لاکھ ڈالرز دیے جائیں گے۔
کھانے پینے کے انتظامات پر 10 لاکھ ڈالرز خرچ کیے جائیں گے۔
دلہن کے لباس پر 15 لاکھ ڈالرز خرچ ہوں گے۔
مہمانوں کو دیے جانے والے تحائف اور یاٹ کی لنگر اندازی کی فیس پر بھی لاکھوں ڈالرز خرچ کیے جائیں گے۔
ہوٹلوں میں مہمانوں کے قیام پر 20 لاکھ ڈالرز کی لاگت آئے گی۔
خواتین مہمانوں کے میک اپ اور ہیئر اسٹائلنگ پر بھی بڑی رقم خرچ کی جائے گی۔
یاد رہے کہ جیف بیزوس نے پہلی شادی 1993 میں میکنزی اسکاٹ سے کی تھی، جو 2019 میں طلاق پر اختتام پذیر ہوئی۔ اس طلاق کے نتیجے میں بیزوس نے اپنی سابقہ اہلیہ کو 35 ارب ڈالرز کی رقم بطور تصفیہ دی تھی۔
