اسلام آباد (نیوز ڈیسک) پاکستانی شادیوں میں نوٹ نچھاور کرنے کی حقیقت، فوٹوگرافر عرفان احسن کے انکشافات نے سب کو حیران کر دیاپاکستان میں شادیوں کے موقع پر پیسوں کی برسات اب ایک معمول بنتی جا رہی ہے، لیکن معروف ویڈنگ فوٹوگرافر عرفان احسن نے اس روایت کے پس پردہ حیران کن حقائق کو سامنے لا کر سب کو چونکا دیا ہے۔
عرفان احسن، جو ملک کی کئی مشہور اور شاہانہ شادیوں کی عکس بندی کر چکے ہیں — جن میں عاطف اسلم اور جنید صفدر جیسے نام شامل ہیں — نے حالیہ ایک ویڈیو میں ان تقریبات میں ہونے والی “پیسہ بازی” کے اصل مقصد پر بات کی۔ان کے مطابق، ’’یہ سارا عمل صرف اور صرف شان و شوکت کے مظاہرے کے لیے کیا جاتا ہے، اس کا اصل فائدہ کسی کو نہیں پہنچتا۔
اکثر فنکار جن پر نوٹ برسائے جاتے ہیں، وہ ان پیسوں سے محروم رہتے ہیں۔‘‘انہوں نے ایک تقریب کا ذکر کرتے ہوئے بتایا کہ قوالوں کو پہلے ہی ہدایت دی گئی تھی کہ اگر زمین پر نوٹ گریں تو وہ انہیں نہ اٹھائیں۔ تقریب کے دوران لاکھوں روپے فضا میں اچھالے گئے، لیکن بعد میں وہی نوٹ دوبارہ سمیٹ کر بیگز میں ڈال لیے گئے، اور فنکاروں کو کچھ نہ دیا گیا۔ایک اور حیرت انگیز اور افسوسناک واقعے کا ذکر کرتے ہوئے عرفان نے بتایا کہ مشہور گلوکار “ملکو” کو شادی میں جعلی نوٹ دیے گئے۔
جب انہوں نے ان نوٹوں کو حقیقی سمجھ کر ایندھن کے لیے استعمال کیا تو پولیس نے انہیں گرفتار کر لیا۔عرفان احسن کی ٹیم نے مزید انکشاف کیا کہ شادیوں میں جو امریکی ڈالر نچھاور کیے جاتے ہیں، وہ عموماً صرف ایک ڈالر کے ہوتے ہیں — اس سے زیادہ مالیت کے نہیں۔یہ تمام انکشافات ایسے وقت میں سامنے آئے ہیں جب ملک بھر میں مہنگائی کا طوفان ہے اور کروڑوں لوگ بنیادی ضروریات زندگی سے محروم ہیں۔ ایسے میں فضول خرچی کی یہ روش سوالیہ نشان بن گئی ہے۔عرفان احسن نے اپنی بات سمیٹتے ہوئے کہا، ’’یہ سب کچھ صرف دولت کی نمائش اور دوسروں پر رعب ڈالنے کا ذریعہ ہے، اس میں اصل خوشی یا سخاوت کا کوئی پہلو نہیں ہوتا۔‘‘
