سیکریٹریٹ کمپلیکس میں رات گئے چیتا داخل، ویڈیو وائرل

اترپردیش(مانیٹرنگ ڈیسک) گجرات کے ریڈزون میں رات گئے داخل ہونے والے چیتے نے سیکیورٹی اہلکاروں کی دوڑیں لگوادیں۔ تفصیلات کے مطابق اتوار کی رات گجرات کے سیکریٹریٹ انکلیو میں رات گئے چیتا داخل ہوا جس کی ویڈیو حساس علاقے میں لگائے جانے والے سی سی ٹی وی میں محفوظ ہوگئیں۔ بھارتی میڈیا کی جانب سے جاری ویڈیو میں دیکھا جاسکتا ہے کہ چیتا زمین اور دروازے کے درمیان خالی جگہ سے داخل ہوا، سیکیورٹی اہلکاروں نے پیر کی صبح سی سی ٹی وی فوٹیج دیکھیں تو اُس کی تلاش شروع کردی اور اراکین اسمبلی سے محتاط رہنے کی ہدایت بھی کی۔ بھارتی میڈیا کے مطابق سیکریٹریٹ کمپلیکس میں انوکھے انداز سے داخل ہونے پر حکام نے چیتے کو پُراسرار مخلوق قرار دیا کیونکہ اُن کا خیال ہے جانور اس طرح داخل ہو ہی نہیں سکتا۔ سیکیورٹی حکام کا کہنا تھا کہ مذکورہ علاقے میں جنگلی جانور موجود نہیں اس لیے چیتے کا داخل ہونا اُن کے لیے حیران کُن ہے۔ جنگلی چیتے کی تلاش کے لیے سیکریٹریٹ کمپلیکس اور اطراف میں سرچ آپریشن کیا گیا جس میں خصوصی کمانڈو دستے بھی شامل ہوئے مگر انہیں 24 گھنٹوں تک تو کامیابی نہ مل سکی بعد ازاں منگل کے روز اہلکاروں نے چیتے کو تلاش کر کے ہلاک کیا۔