اسلام آباد (مانیٹرنگ ڈیسک) آئی جی پولیس اسلام آباد ڈاکٹر سلطان اعظم تیموری نے اعلان کیاہے کہ وفاقی دارالحکومت میں چینی باشندوں کو لوٹنے اور ایک چینی خاتون کو قتل کرنے والے 4رکنی گروہ کے 3ملزمان کو گروہ کے سرغنہ سمیت گرفتار کرلیا گیا ہے،چوتھے ملزمان کی گرفتاری بھی جلد عمل میں لائی جائے گیچینی شہریوں کو فول پروف سیکیورٹی کی فراہمی کے حوالے سے ان سے مسلسل رابطے میں ہیں۔
پولیس لائنز ہیڈکوارٹرز میں پریس کانفرنس کرتے ہوئے آئی جی پولیس ڈاکٹر سلطان اعظم تیموری نے کہا کہ تھانہ رمنا کے علاقہ میں نامعلوم ملزمان نے دوران واردات مزاحمت ایک چائنیز خاتون کو قتل کر دیا تھا اور گھر سے نقدی لوٹ کر فرار ہو گئے تھے جس کے متعلق مقدمہ نمبر 364مورخہ 29.12.2017 زیر دفعہ 397/302ت پ تھانہ رمنا درج رجسٹر ہوا۔ابتدائی تفتیش مقامی پولیس نے عمل میں لائی۔ انہوں نے بتایا کہ پولیس ٹیم نے وفاقی دارلحکومت اسلام آباد میں سابقہ سزا یافتہ ،ریکارڈ یافتہ کریمینلزکے ریکارڈ کو چیک کیا اورتکنیکی بنیادوں پر تفتیش کے عمل کو آگے بڑھاتے ہوئے اس وقوعہ میں ملوث ملزمان تک جاپہنچی اور ان کو ٹریس کر کے گرفتاری عمل میں لائی ،ملزمان میں سید تحسین ولد سید گل حسین شاہ،(گینگ لیڈر)،سیدذوالقرنین ولدسید کمال حسین شاہ،خرم ابراہیم ولد محمد ابراہیم ستی شامل ہیں۔ انہوں نے بتایا کہ ملزمان کے قبضہ سے دو پسٹلز،ہتھوڑا سٹیل،آئرن راڈ،پیچ کس ،دو عدد چابیاں،نقاب،سکاچ ٹیپ، نقد رقم ایک لاکھ 60ہزار روپے ،دو عدد لیپ ٹاپ اور ایک موبائل فون برآمد کر لیا گیا ہے اوروارداتوں کے دوران ملزمان کے زیر استعمال موٹر سائیکل بھی قبضہ پولیس میں لے لیا ہے۔ انہوں نے بتایا کہ ابتدائی تفتیش کے دوران ملزمان نے تھانہ رمنا کے علاقہ میں ایک ڈکیتی کے دوران مزاحمت پر ایک چائنیز خاتون کو قتل کر دیا تھا۔
