کیف(نیوزایجنسیاں)نوجوان نسل پر اسمارٹ فون کا جنون ایسا سوار ہے کہ یوکرین میں ایک نوجوان نے ”آئی فون 7“ کے حصول کیلئے اپنا نام ہی ’آئی فون 7‘ رکھ لیا۔ذرائع ابلاغ کے مطابق یوکرین میں ایک مقامی اسمارٹ فون اسٹور کی طرف سے اعلان کیا گیا کہ وہ ایسے 5 افراد کو ”آئی فون 7“ مفت فراہم کرے گا جو اپنا نام اس کے نام سے منسوب کریں گے، اس پر ایک 20 سالہ نوجوان نے سرکاری دستاویزات میں اپنا نام تبدیل کرتے ہوئے ”آئی فون 7“ رکھ لیا۔
پہلے تو لوگوں نے اسے مذاق سمجھا مگر بعد میں معلوم ہوا کہ اسمارٹ فون کے شوقین نے سچ مچ اپنا نام ’آئی فون 7‘ رکھ لیا ہے، مقامی اسٹور کی طرف سے اپنا نام تبدیل کرنیوالے نوجوان کو وعدے کے مطابق ’آئی فون 7‘ کا ایک سیٹ تحفے میں پیش کیا گیا ہے۔اسٹور کے منتظمین کا کہنا ہے کہ وہ مزید 4 آئی فون سیٹ اسی شرط پر مفت فراہم کریں گے تاہم مزید کسی شہری کی طرف سے اپنا نام ’آئی فون 7‘ رکھنے کا کوئی واقعہ پیش نہیں آیا ہے۔اپنا نام آئی فون 7 رکھنے والے نوجوان کا کہنا ہے کہ اسمارٹ فون حاصل کرنے کے بعد وہ اپنا سابقہ نام ’الیگزینڈر ٹورینو“ دوبارہ رکھ لے گا کیونکہ وہ اسی نام کے ساتھ شادی کرنا اور باپ بننا چاہتا ہے۔
خیال رہے کہ یوکرین میں اسمارٹ فون ’آئی فون 7‘ 850 امریکی ڈالر میں فروخت ہورہا ہے جبکہ وہاں پر نام کی تبدیلی صرف 2 امریکی ڈالر میں ہوجاتی ہے، اپنا نام ’آئی فون 7‘ رکھنے والے نوجوان کے اقارب بھی اس اقدام پر حیران ہیں، اس کی ہمشیرہ کا کہنا ہے کہ ہمیں یقین نہیں آرہا کہ ہمارے بھائی نے اپنا نام آئی فون 7 رکھ لیا ہے، اس نام کو قبول نہیں کیا جاسکتا۔
