برمنگھم (نیوزڈیسک) مردوں کے فیشن کا لازمی حصہ سمجھی جانے والی کلائی کی گھڑی کی دلچسپ تاریخ سے معلوم ہوتا ہے کہ بیسویں صدی سے قبل یہ صرف خواتین کے استعمال کی چیز تھی، جبکہ مردوں میں اس کے استعمال کا کوئی تصور نہ پایا جاتا تھا۔
آج سے ایک صدی قبل رسٹلیٹ کہلانے والی گھڑی کو خواتین کی آرائش و زیبائش کی دیگر اشیاءکی طرح بہت نازک بنایا جاتا تھا اور مرد اسے اپنے استعمال کے قابل نہ سمجھتے تھے۔ مردوں میں کلائی کی گھڑی کا استعمال سب سے پہلے جرمن بحریہ نے شروع کیا۔ جرمن بحری فوجیوں کو جیب میں رکھنے والی گھڑی دی جاتی تھی جس کے ساتھ ایک پٹہ جڑا ہوتا تھا۔ جنوبی افریقہ میں 1899ءسے 1902ءتک لڑی جانے والی جنگ بوئر کے دوران فوجی حملوں کو مربوط کرنے کے لئے گھڑی کے استعمال کی افادیت سامنے آئی اور اس کے بعد برطانوی فوج نے اس کے استعمال کو فروغ دیا۔ اومیگا کمپنی نے کلائی کی گھڑی کو مقبول عام بنانے میں اہم کردار ادا کیا اور جنگ عظیم اول کے بعد مردوں میں بھی کلائی کی گھڑی کا استعمال عام ہوگیا۔ یوں خواتین کا فیشن بالآخر مردوں کی زندگی کا لازمی حصہ بن گیا۔
