چنائی(نیوز ڈیسک) سننے میں یہ عجیب سا لگتا ہے لیکن بھارت میں ایک 61 سالہ خاتون نے چند ماہ قبل اپنی ہی پوتی کو جنم دیا ہے۔ نئی پیدا ہونے والی بچی کی ماں اس خاتون کی بیٹی ہے جبکہ باپ اس خاتون کا داماد ہے۔ایک پرائیویٹ ہسپتال آکاش فرٹیلیٹی سنٹر کے ڈاکٹروں کا کہنا ہے کہ ایک نوجوان لڑکی اور اس کی ماں ان کے پاس کچھ عرصہ قبل یہ معلوم کرنے آئے تھے کہ کیا ہسپتال میں یہ سہولت موجود ہے کہ ماں یا متبادل ماں کے ذریعے بچہ پیدا کیا جاسکے۔ ڈاکٹر جیارانی کاماراج کا کہنا تھاکہ بوڑھی خاتون نے 2.7کلو گرام کی ایک صحت مند بچی کو جنم دیا اور ساتھ ہی اپنا دودھ بھی پلایا۔ اس کا کہنا تھا کہ تامل ناڈو میں یہ پہلی بار ہوا ہے کہ ایک متبادل ماں نے اپنی پوتی کو جنم دیا ہے۔ اس کا کہنا تھا کہ نوجوان خاتون کو پیچیدگیوں کی وجہ سے ڈاکٹروں نے بتا دیا تھا کہ وہ ماں نہیں بن سکتی لہذا اس کی ماں کو متبادل کے طور پر استعمال کیا گیا۔ اس کا مزید کہنا تھا کہ انڈہ بیٹی کا اور سپرم داماد کا تھا جو کہ ساس کی کوکھ میں رکھ کر بچہ پیدا کیا گیا۔