لندن(نیوز ڈیسک )یوں تو دنیا بھر سے سیاح بھارت کی قدیم ثقافت اور تاریخی یادگاریں دیکھنے کیلئے یہاں کا رخ کرتے ہیں لیکن خواتین سیاح یہاں جانے سے گریز ہی کریں تو بہتر ہو گا۔ جی ہاں برطانوی ریسرچ کمپنی کی سروے رپورٹ کے مطابق بھارت کو خواتین سیاحوں کیلئے غیر محفوظ اور دنیا کا سب سے خطرناک ملک قرار دے دیا گیا ہے۔سروے رپورٹ کے مطابق بھارت کے اپنے نیشنل کرائم ریکارڈ بیوروکا کہنا ہے کہ 2010سے بھارت میں جرائم کی شرح میں7.1 فیصد اضافہ ہوا ہے جبکہ 20میں سے صرف ایک ہی جنسی حملے کی رپورٹ منظرِ عام پر آتی ہے۔ صرف یہی نہیں بلکہ رپورٹس کے مطابق حالیہ صورتحال میں تو ہر بیس منٹ میں ایک جنسی حملہ رپورٹ ہوتا ہے جس کے باعث بھارت جانے والی خواتین سیاحوں کو نہایت احتیاط کا مشورہ دیا گیا ہے۔اسی فہرست میں دوسرے نمبر پر برازیل ہے جہاں جرائم پیشہ گروہوں کے بڑھتے تشدد اور زیادتی کے واقعات کی شرح نے اسے خواتین سیاحوں کیلئے خطرہ بنا دیا ہے جبکہ اس فہرست میں تیسرے چوتھے اور پانچویں نمبر پر بالترتیب ترکی ، تھائی لینڈ اور مصر موجود ہیں۔