اسلا م آباد (نیوز ڈیسک) اکثر کہا جاتا ہے کہ “روزانہ ایک سیب کھائیں اور ڈاکٹر سے دور رہیں”۔ یہ دعویٰ کس حد تک درست ہے، اس پر بحث کی جا سکتی ہے، مگر ماہرین کے مطابق روزانہ سیب کھانے سے بڑھتی عمر کے باوجود آپ جوان اور تروتازہ نظر آ سکتے ہیں۔

تحقیقی مطالعات سے پتا چلا ہے کہ سیب میں ایسے اجزا پائے جاتے ہیں جو جِلد پر بڑھاپے کے اثرات کو سست کرتے ہیں اور مختلف نقصانات سے حفاظت فراہم کرتے ہیں۔

جِلد پر سورج کے اثرات اور سیب

زیادہ دیر سورج کی روشنی میں رہنے سے جِلد پر سرخی، رنگت کی تبدیلی، موٹائی میں فرق اور ورم جیسی علامات ظاہر ہوتی ہیں۔ ساتھ ہی جلد کے کینسر کا خطرہ بھی بڑھ جاتا ہے۔ سیب میں موجود اینٹی آکسائیڈنٹس جِلد کو سورج کی شعاعوں، فضائی آلودگی اور دیگر ماحولیاتی اثرات سے محفوظ رکھتے ہیں۔

ایک تحقیق کے مطابق، سیب کے پولی فینولز پر مبنی سپلیمنٹ کے استعمال سے سورج کی شعاعوں کے نقصانات اور جِلد پر بڑھاپے کی علامات میں کمی آتی ہے۔

جِلد کی لچک اور خلیات

ہمارا مدافعتی نظام پرانے خلیات کو صاف کرکے نئے خلیات پیدا کرتا رہتا ہے، لیکن عمر بڑھنے کے ساتھ یہ عمل سست ہو جاتا ہے، جس سے جِلد کی لچک اور چمک ختم ہونے لگتی ہے۔ رپورٹس میں بتایا گیا ہے کہ سیب کے اسٹیم سیلز سے تیار کردہ اسکن سیرم جِلد کو بہتر بناتا ہے اور جھریوں کے بننے کے عمل کو سست کرتا ہے۔

ورم کش خصوصیات

سیب میں موجود پولی فینولز، خاص طور پر فلیونوئڈز، خلیات کی صحت کو بہتر بنانے اور جِلد کے ورم کو کم کرنے میں مددگار سمجھے جاتے ہیں۔ تحقیقی شواہد یہ بھی بتاتے ہیں کہ سیب کھانے سے دائمی ورم کم ہوتا ہے، جو جِلد پر قبل از وقت بڑھاپے کی بڑی وجہ ہے۔

پانی کی مقدار

سیب کا تقریباً 80 سے 89 فیصد حصہ پانی پر مشتمل ہوتا ہے۔ یہ جسم اور جِلد کو نمی فراہم کرتا ہے، جس سے جِلد کی تروتازگی اور لچک برقرار رہتی ہے اور بڑھاپے کے اثرات کم نظر آتے ہیں۔