جنیوا (مانیٹرنگ ڈیسک) سوئٹرز لینڈ میں کی جانے والی ایک نئی تحقیق سے اس سوال کا جواب مل گیا ہے کہ زیادہ گہری نیند بستر پر آتی ہے یا جھولے میں۔ ماہرین کا کہنا ہے کہ اگر کسی کو نیند کا مسئلہ لاحق ہے تو اس کا یہ مسئلہ تھوڑے سے پیسے خرچ کرنے سے حل ہو سکتا ہے۔
نئی تحقیق سے یہ بات سامنے آئی ہے کہ جھولے میں آہستگی سے ہلتے ہوئے نہ صرف لوگوں کو جلد سو جانے میں مدد ملتی ہے بلکہ نیند کا معیار بھی بہتر ہو جاتا ہے۔ جنیوا یونی ورسٹی کے ماہرین کا یہ بھی کہنا ہے کہ جھولے پر سونے والے کی یادداشت بھی اچھی ہو جاتی ہے۔ عام طور پر اب تک یہ سمجھا جا رہا تھا کہ بچوں کو جھولے میں بہتر نیند آتی ہے، تاہم نئی تحقیق نے ثابت کیا ہے کہ بڑوں کو بھی جھولے میں گہری نیند آتی ہے اور ان کی ذہنی صحت پر اس سے مثبت اثرات مرتب ہوتے ہیں۔ یونی ورسٹی نے اپنی تحقیق کے لیے ایک خاص جھولنے والا بستر بنایا، جس کی آزمائش اٹھارہ نوجوانوں پر کی گئی، نتائج نے بتایا کہ نوجوانوں کو عام بستر کے مقابلے میں خاص جھولنے والے بستر پر زیادہ گہری نیند آئی۔ یہ بھی معلوم ہوا کہ جھولنے والے بستر پر نیند بھی زیادہ بار نہیں ٹوٹتی، جھولنے سے دماغ میں چلنے والی لہروں کی حرکت سست پڑ جاتی ہے، جس سے نیند گہری ہو جاتی ہے۔
