فیصل آباد (آن لائن)روس کے فروٹ امپورٹرز نے پاکستانی سیب درآمد کرنے میں زبردست دلچسپی ظاہر کی ہے لہٰذا روس کی منڈیوں سے استفادہ کر کے قیمتی زرمبادلہ کا حصول ممکن بنایا جا سکتا ہے،پاکستان رواں سال 14 لاکھ 95 ہزار ٹن سیب کی پیداوار کے لحاظ سے دنیا بھر کے ممالک میں دسویں نمبر پر آگیا ہے جبکہ سیب کی عالمی تجارت کا حجم بھی ساڑھے 6 ملین ٹن سے تجاوز کر گیا ہے لہٰذااگر حکومت سیب کے باغبانوں کو جدید ٹیکنالوجی کی فراہمی سمیت سیب کے برآمد کنندگان کو جدید سہولیات

فراہم کرے اور نئی منڈیاں تلاش کرے تو ملکی آمدنی میں نمایاں اضافہ کرسکتا ہے۔ایپل گروئرز اینڈ ایکسپورٹرز ایسوسی ایشن کے ترجما ن نے بتایا کہ جس طر ح دنیابھر میں پاکستانی آم اور کینو کو انتہائی پسندیدگی کی نظر سے دیکھا جاتا ہے اسی طرح اپنے ذائقے،لذت اور معیار کے باعث پاکستانی سیب کو بھی عالمی منڈیوں میں نمایاں مقام حاصل ہے۔انہوں نے بتایا کہ معمولی سی کوشش کے بعد سیب کی پیداوار میں 2 ٹن فی ایکڑ کا باآسانی اضافہ کر کے 30 ارب روپے کی اضافی آمدنی حاصل کی جاسکتی ہے۔