لاہور(نیوز ڈیسک) برسات کا موسم شروع ہوچکا ہے اور ایسے موسم میں تیز بارشیں عام ہو جاتی ہیں۔ کچھ لوگ شوق سے ان بارشوں میں نہاتے ہیں لیکن اس کی وجہ سے آنکھیں سرخ ہوجاتی ہیں اور ان میں سوزش ہونے لگتی ہے۔ کئی لوگ انہیں عام سی بات سمجھ کر نظر انداز کر دیتے ہیں لیکن ماہرین چشم کا کہنا ہے کہ انہیں معمولی سمجھ کر چھوڑ نہیں دینا چاہیے بلکہ اس کا علاج ازحد ضروری ہے۔ ان کا کہنا ہے کہ بارش کا پانی اگر آنکھوں میں براہ راست چلا جائے تو انفیکشن کے امکانات بڑھ جاتے ہیں۔ ان کا کہنا ہے کہ اس وجہ سے آنکھوں کی سوجن ہوسکتی ہے اور اسے نظر انداز کرنے سے بینائی بھی ضائع ہوسکتی ہے۔ اس کے علاوہ بھی ایسی بیماری ہے جو کہ برسات کے موسم میں عام ہوتی ہے اور اس کا شکار زیادہ تر بچے ہوتے ہیں۔ ماہر چشم کا کہنا ہے کہ اس موسم میں ایک دوسرے کا تولیہ استعمال کرنے سے گریز کرنا چاہیے کیونکہ یہ انفیکشن مشترکہ کپڑوں اور تولیہ استعمال کرنے سے ہوتی ہے۔ ڈاکٹروں کا کہنا ہے کہ اگر آپ کی آنکھوں میں سوجن آجائے اور وہ سرخ ہو جائیں تو پھر انہیں ٹھنڈے پانی کے ساتھ دھوئیں اور ان میں ’’بوریک ‘‘شامل کرلیں۔ اگر آنکھوں میں سرخ دانہ نکل آئے تو ایسی آنکھوں کو نیم گرم پانی سے دھوئیں۔ آنکھوں کی بیماری کی صورت میں ٹی وی اور موبائل کا استعمال ترک کردیں۔ کوئی بھی ایسا کام نہ کریں جس میں آنکھوں کی توجہ ایک ہی جگہ مرکوز ہو۔