اسلام آباد(نیوز ڈیسک) امریکی محققین کا کہنا ہے کہ الیکٹرانک سگریٹس بھی صحت کے لیے نقصان دہ ہے۔ماہرین کی رپورٹ کے مطابق ای سگریٹ میں استعمال کیے جانے والے زیادہ تر ذائقے دار سیال مادوں کا سانس کی بیماریوں کے ساتھ ربط پایا جاتا ہے، جو پھیپھڑوں کے لیے نقصان دہ ہو سکتے ہیں۔ماہرین کی رپورٹ کے مطابق مارکیٹ میں دستیاب چار ای سگریٹس میں سے تین میں ایسے لیکوڈ ذائقے استعمال کیے جا رہے ہیں جن کا سانس کی بیماریوں سے تعلق پایا گیا ہے۔ ای سگریٹ ایک الیکٹرانک ڈیوائس ہے جو بیٹری سے چلتی ہے۔ ان سگریٹوں میں مائع حالت میں نکوٹین بھری جاتی ہے جو بیٹری کے گرم ہونے کی صورت میںدھوئیں میں تبدیل ہو جاتی ہے۔ عام سگریٹوں کی طرح سگریٹ نوش اس نکوٹین کو کش کے ذریعے اپنے پھیپھڑوں میں اتارتے ہیں۔ماہرین نے خدشہ ظاہر کیا ہے کہ بغیر ریگولیشن کے مارکیٹ میں دستیاب یہ سگریٹس بھی مضر صحت ہو سکتے ہیں۔اس سلسلے میں امریکا میں ایسے مطالبات بھی اٹھنے لگے ہیں کہ ان ای سگریٹس پر بھی حکومتی کنٹرول قائم کیا جائے ورنہ دوسری صورت میں نوجوانوں میں اس کی لت عام ہو سکتی ہے۔ ای سگریٹ بنانے والی کمپنیوں نے نوجوانوں کو متوجہ کرنے کے لیے جو ذائقے متعارف کرائے ہیں، ان میں تین کے مضر صحت ہونے کے شواہد ملے ہیں۔ ہارورڈ یونیورسٹی کے سائنسدانوں نے کل چار مصنوعی ذائقوں کا لیبارٹری ٹیسٹ کیا ہے۔ نتائج کے مطابق ان میں سے تین کاٹن،سکویرٹس فروٹ کینڈی اور کپ کیک میں ایسے عناصر پائے گئے ہیں، جو سانس کی بیماریوں کی وجہ یا انہیں مزید خراب کرنے کا باعث بن سکتے ہیں۔ انوائرنمنٹل جینیٹکس کے پروفیسر ڈیوڈ کرسٹیانی کے بقول مختلف ای سگریٹوں میں نکوٹین کی تعداد بھی مختلف ہوتی ہے جبکہ اس میں ایسے کیمیکلز بھی ہو سکتے ہیں جو کینسر کی بیماری پیدا کرنے کے حامل ہوتے ہیں۔ انہوں نے مزید کہا کہ ان کی سٹڈی یہ واضح ہے کہ ای سگریٹوں کے کچھ ذائقوں میں پائے جانے والے کیمیکلز پھیپھڑوں کے لیے نقصان دہ ہوتے ہیں۔