اسلام آباد(نیوزڈیسک ) جاپانی سائنسدانوں کی جانب سے تجربہ گاہ میں تیار کیے گئے گردوں کی جانوروں میں کامیابی سے پیوند کاری کی گئی جس کے بعد ماہرین نے امید ظاہر کی ہےکہ اس طرح کے گردوں کی انسانوں میں منتقلی کی بھی راہ ہموار ہوئی ہے۔ سائنسدانوں کا کہنا ہےکہ جاپانی یونیورسٹی میں اس کامیابی کے بعد تجربہ گاہوں میں تیارکردہ گردوں کی جانوروں میں منتقلی سے انسانوں میں گردوں کی منتقلی کی بھی راہ ہموار ہوئی ہے لیکن اس میں بھی کئی سال لگ سکتے ہیں کیونکہ اگلے مرحلے میں اسے مزید پیچیدہ جانوروں مثلاً چپمانزیوں پر آزمایا جاسکتا ہے۔ اس کے لیے ماہرین نے اسٹیم سیل (خلیاتِ ساق) کو آزمایا اور اس سے پیشاب کی نالی اور مثانہ بھی تیار کیا جب کہ جب اسے 8 ہفتے تک چوہوں پر آزمایا گیا تو پورا نظام اچھی طرح کام کرتا رہا جس کے بعد اسے سو¿ر جیسے بڑے جانور میں لگایا اور مثبت نتائج برآمد ہوئے۔
لندن میں اسٹیم سیل اور اعضا تیار کرنے کی ٹیکنالوجی کے ماہر کرس میسن نے کہا کہ اگرچہ یہ ایک اچھی کاوش ہے لیکن ابھی کچھ نہیں کہا جاسکتا کہ یہ انسانوں پر کام بھی کرسکے گی یا نہیں کیونکہ انسان کا نظام کئی چیزوں پر مشتمل اور نہایت پیچیدہ ہوتا ہے۔