اسلام آباد۔۔۔۔یورپی یونین نے پاکستان کی جانب سے سزائے موت پر پابندی اٹھانے کے معاملے پر شدید ردعمل کا اظہار کرتے ہوئے پابندی بحال کرنے کا مطالبہ کیا ہے۔پاکستان میں یورپی یونین کے سفیر لارس گنار وگیمارک کی جانب سے جاری ہونے والے ایک بیان میں کہا گیا ہے کہ دہشت گردی کے خلاف جنگ میں سزائے موت موثر ہتھیار نہیں۔سفیر کا کہنا تھا کہ یورپی یونین کو حکومت پاکستان کی جانب سے سزائے موت پر پابندی اٹھانے کے فیصلے سے مایوسی ہوئی ہے۔انھوں نے پابندی کو جلد از جلد دوبارہ عائد کرنے کی امید کا اظہار کرتے ہوئے کہا کہ یورپی یونین کسی بھی طرح کی صورتحال میں سزائے موت کے خلاف ہے۔تاہم لارس گنار نے یقین دلایا کہ یورپی یونین سانحہ پشاور کے بعد غم کی اس گھڑی میں حکومت پاکستان کے ساتھ ہے اور دہشت گردی سے نمٹنے کے لیے حکومت پاکستان اور پاکستانی عوام کے عزم اور کوششوں کو بھی سراہتی ہے۔واضح رہے کہ 16 دسمبر کو پشاور کے آرمی پبلک اسکول پر تحریک طالبان پاکستان (ٹی ٹی پی) کے حملے کے نتیجے میں 133 بچوں سمیت 144 افراد کی ہلاکت کے بعد 17 دسمبر کو وزیراعظم نواز شریف نے دہشت گردی کے مقدمات میں قید مجرموں کی سزائے موت پر پابندی ختم کرنے کا اعلان کیا تھا۔