کراچی: سندھ پولیس کی تاریخ میں پہلی مرتبہ سندھ پولیس کسی غیر ملکی پولیس کو تربیت فراہم کرے گی۔
نائیجیریا نے سندھ پولیس کے ٹریننگ کے معیار کو دیکھتے ہوئے درخواست کی ہے کہ سندھ پولیس نائیجیریا میں تربیت فراہم کرے، اس سلسلے میں دونوں ممالک کے حکام نے ابتدائی بات چیت مکمل کرلی ہے جسے جلد ہی تحریری معاہدے کی شکل دے دی جائے گی، ڈی آئی جی ٹریننگ ڈاکٹر جمیل نے بتایا کہ نائیجیریا کے حکام نے درخواست کی ہے کہ سندھ پولیس نائیجیریا کی پولیس کو تربیت فراہم کرے۔
اس ضمن میں ایکسپو سینٹر میں جاری نمائش آئیڈیاز کے دوران نائیجیریا کے حکام نے سندھ پولیس کے اسٹال کا دورہ کیا اور تربیت کے حوالے سے معلومات حاصل کیں جس پر انھیں تفصیلی بریفنگ دی گئی، نائیجیریا کے حکام نے کمانڈوٹریننگ، آپریشنل فورس (ریگولر پولیس) اور ہنگامہ آرائی و بلوے پرقابو پانے کے حوالے سے دکھائی جانے والی پریزنٹیشن میں خصوصی دلچسپی لی ہے، ایک سوال کے جواب میں ڈی آئی جی محمد جمیل نے بتایا کہ نائیجیریا میں امن و امان کی مخدوش صورتحال کے دوران پولیس کی ٹریننگ اکیڈمی پر بھی قبضہ کرلیاگیاہے ، ممکنہ طور پر نائیجیریا میں نئی ٹریننگ اکیڈمی قائم کی جائے گی۔
