نئی دہلی ۔۔۔۔بھارت کے دارالحکومت نئی دہلی سے تقریباً 100 کلومیٹر کے فاصلے پر ہندوؤں کا ایک مقدس شہر متھرا ہے جہاں کے بندروں میں ایک عجیب شوق پایا جاتا ہے۔شہر کے بندر متھرا کی زیارت یا پوجا پاٹ کرنے کے لیے آنے والے افراد کے دھوپ سے بچنے والے چشموں کو چھین لیتے ہیں چاہے وہ عینک آنکھوں پر لگی ہو یا پھر جیب میں ہو۔ان بندروں کے اس رویے اور ان کی تعداد کو ذہن میں رکھتے ہوئے متھرا کی انتظامیہ نے بھارتی صدر پرنب مکھرجی کی حفاظت کے لیے 10 لنگوروں پر مشتمل ایک چھوٹی سی فوج تیار کی ہے۔صدر پرنب مکھرجی 16 نومبر کو ورنداون کے چندرودئے مندر کا سنگِ بنیاد کی تقریب کے لیے متھرا جا رہے ہیں۔سنگِ بنیاد کی تقریب کے بعد وہ بان ے بہاری مندر بھی جائیں گے جہاں بندروں کی دہشت سب سے زیادہ ہے۔متھرا کی سینیئر پولیس افسر منزل سینی نے بتایا ہے کہ صدر پرنب مکھرجی کا قافلہ جس راستے سے بھی گزرے گا اس پر یہ لنگور پورا دن تعینات رہیں گے۔
صدر پرنب مکھرجی 16 نومبر کو ورنداون کے چندرودئے مندر کا سنگِ بنیاد کی تقریب کے لیے متھرا جائیں گے
منزل سینی کے مطابق بھگوان کرشن کی جنم بھومی ٹرسٹ سے فی لنگور ایک ہزار روپے یومیہ کے حساب سے کرائے پر لیے گئے ہیں۔
یہ رقم قومی دیہی روز گار منصوبے کے مطابق 125 روپے یومیہ ملنے والی مزدوری سے کئی گنا زیادہ ہے۔
کرشن جنم بھومی ٹرسٹ کے سیکریٹری کپل شرما نے بتایا ’ان کے پاس صرف دو لنگور ہیں جو صدر کی سیکورٹی انتظامات کے لیے تعینات ہیں۔ ٹرسٹ ان لنگوروں کے لیے 14 ہزار روپے ماہانہ خرچ کرتا ہے۔ باقی آٹھ لنگور کہیں دوسری جگہ سے لائے گئے ہیں۔‘
ورنداون چندرودئے مندر کے رابطہ عامہ اور وی آئی پی مہمانوں کی خدمات کے محکمے کے انچارج نوین کہتے ہیں کہ اس مندر میں بندروں کا اتنا خوف نہیں ہے۔ ہیلی پیڈ سے مندر بس چند قدم کے فاصلے پر ہے۔
صدر کی آمد سے پہلے ان کے پورے روٹ کو پولیس، این ایس جی کمانڈوز، ایس پی جی اور فوج کے حوالے کر دیا جائے گا۔
